人生際遇真係好奇妙！有時一個唔起眼嘅相遇，隨時可能改寫你一生。美國有位少女，16歲嗰陣為咗賺生活費，喺餐廳做侍應，點知竟然因為咁而遇到人生伯樂，一次偶然對話，令佢嘅人生軌跡徹底改變。經過17年嘅奮鬥，佢由一個普通嘅餐廳打工妹，逆襲成為公司CEO，佢嘅經歷真係比電影情節更要精彩！

16歲打工遇上人生伯樂 餐廳熟客一番話扭轉命運

事主弗羅伊斯（Marissa Frois）憶述，當年16歲嘅佢喺餐廳打工，遇到一對經常光顧嘅夫婦泰瑞（Terry）同凱倫（Karen）。夫婦二人非常友善，成日同佢傾偈，仲分享自己嘅創業故事。泰瑞當時經營一間名為「創業家之源」嘅公司，專門幫人創業。雖然當時弗羅伊斯對「加盟」呢啲商業術語一無所知，只係聯想到快餐店，但泰瑞從來無因為佢年紀細而睇小佢，無論對住邊個都保持尊重同熱情，呢種態度令弗羅伊斯留下極深刻嘅印象。原本立志成為兒童心理學家嘅佢，大學畢業後，竟然接受咗泰瑞提供嘅暑期實習機會，從此踏上一條完全唔同嘅路。

34歲獲破格提拔做CEO 事主一度焦慮不安險錯失良機

估唔到，呢份暑期實習一做就係17年。弗羅伊斯由實習生做起，憑住努力一路晉升到行銷總監，再涉足銷售同營運部門，喺公司內快速成長。4年前，年僅34歲、已經係兩子之母嘅弗羅伊斯，突然收到恩師泰瑞嘅邀請，希望佢接任行政總裁一職。面對呢個突如其來嘅重任，弗羅伊斯當堂嚇一跳，充滿焦慮，不斷懷疑自己係咪真係有能力帶領成間公司。當佢向泰瑞坦白自己嘅不安時，對方嘅一句話，徹底改變咗佢嘅諗法。

恩師一句話點醒 餐廳妹逆襲成女強人揭成功之道

當時泰瑞只係望住佢，反問一句：「妳至今有搞砸過任何事嗎？」呢句簡單而有力嘅說話，好似當頭棒喝，令弗羅伊斯深受鼓舞，決定接受挑戰。回望過去17年，由一個喺餐廳捧餐嘅少女，到今日成為企業嘅掌舵人，弗羅伊斯感慨萬千。佢話呢段經歷令佢明白，人生中每一次對話都可能係轉捩點，而真正有遠見嘅領袖，絕對唔會單憑履歷、職銜或年齡去判斷一個人嘅價值，因為真正嘅人才，往往就隱藏喺最意想不到嘅地方！