正所謂「工字不出頭」，但如果有一份年薪高達271萬港元嘅筍工，你又會唔會為佢賣命？美國一位年僅25歲嘅史丹福大學畢業生，24歲就已經係人生勝利組，坐擁271萬年薪，點知高薪背後代價極大，壓力爆煲搞到嚴重脫髮，最終佢決定放棄一切。當人人都以為佢傻，佢嘅結局卻令所有人大跌眼鏡！

年薪271萬日做夜做錯過家人生活 壓力爆煲身體響警號

事主居萊爾（Sarah Guller）係史丹福大學畢業嘅高材生，一畢業就直接殺入金融圈，喺私募股權公司任職，24歲年薪已高達34.6萬美元（約271萬港元），絕對係「錢」途無可限量。不過，喺風光背後，事主大呻自己嘅生活完全淪為一部被操控嘅機器，唔單止要瘋狂加班到深夜，連家人嘅生日都會錯過。巨大嘅工作壓力，令佢嘅身體終於響起警號，出現大量脫髮問題，令佢不禁陷入「我應該要快樂，但點解我咁痛苦」嘅掙扎之中。

事件引發熱議網民驚訝 揭人生勝利組背後辛酸血淚史

事件曝光後，唔少網民都對事主嘅經歷感到震驚，紛紛慨嘆「有錢都未必買到快樂」。大家一方面對佢年紀輕輕就賺取天價年薪感到咋舌，另一方面更對「人生勝利組」背後所承受嘅巨大壓力同辛酸感到心痛。有網民直言，用健康換取金錢絕對係最唔划算嘅交易，睇到事主壓力大到脫髮，就明白再高嘅人工都彌補唔到身心嘅創傷。

毅然裸辭創業收入剩零頭 事主不後悔：搵返健康同時間

大約兩年半前，一次同WNBA運動員好友嘅對話，啟發咗事主嘅創業念頭。佢發現市面上極度缺乏專為高強度運動而設嘅美妝品牌，於是毅然放棄271萬年薪「裸辭」創業。雖然目前品牌上線僅一個月，收入大減到只剩昔日嘅零頭，由以往隨手買名牌、隨時去奢華旅行，到而家要就住使，但事主強調從未後悔。佢表示，而家雖然一樣工時長，但係為自己熱愛嘅事業奮鬥，可以中午去上普拉提堂，為自己準備健康三餐，最重要係重新掌握咗自己嘅時間同健康，呢啲都係再多錢都買唔返嘅珍貴寶物。