執屋絕對係唔少人嘅惡夢，但如果執屋可以執到$4623萬，你又點睇？美國新澤西州就有一名男子，因為一個無心之舉，將一張中咗頭獎嘅彩票遺忘喺褲袋足足一年，直到兌獎期限前8日先奇蹟搵返！成件事驚險過坐過山車，差一步呢筆巨款就會化為烏有，真係聽到都覺得肉緊！

執屋翻出陳年褲袋驚揭中頭獎

事緣喺舊年5月，呢位幸運兒喺新澤西州一間加油站買咗張Pick-6彩票，之後就隨手塞入褲袋，從此拋諸腦後。點知呢張「爛紙仔」竟然就係價值590萬美元（約4623萬港元）嘅頭獎彩票！由於獎金成年都無人認領，彩票公司再次發出「尋人啟事」，事主睇到新聞後心血來潮，心諗：「個幸運兒會唔會係我？」佢返屋企之後即刻展開地毯式搜索，將全屋抽屜、文件夾反轉再反轉，最後竟然喺一條好耐無著過嘅舊褲袋入面，搵到一張皺到梅菜咁嘅彩票。佢本來只係諗住check下有冇過期，點知一掃描，先發現自己就係全城搵緊嘅天選之人！

網民洗版式留言稱要立即翻箱倒籠

事件曝光後，大批網民替事主不值之餘，更多係覺得難以置信，即刻引發群組洗版！唔少網民都話要即刻返屋企「尋寶」，紛紛留言：「而家即刻去摷晒啲舊衫舊褲出嚟！」、「呢個故事教訓我哋，垃圾真係唔可以亂掉」、「財神爺真係差啲過門不入，好彩最後都追得返！」亦有網民笑稱，呢種運氣比中頭獎本身更難得：「比中獎更扯嘅係差啲過期」、「執返張彩票仲興奮過中獎嗰刻！」成件事嘅戲劇性令網民睇得非常投入。

最後8日火速兌獎險過剃頭保住巨款

最驚險嘅係，當事主發現中獎時，距離兌獎死線只係剩返短短8日！如果佢再遲多少少先心血來潮去執屋，呢$4623萬獎金就會同佢擦身而過，永遠作廢。事主憶述當時發現中獎後，興奮到成個人都震晒，完全唔敢相信自己對眼。佢火速喺5月14日趕去彩票公司總部，終於喺限期前成功兌獎，保住呢筆足以改變人生嘅巨款。據了解，佢計劃將獎金用嚟找數、儲起做退休金同改善家人生活。彩票公司都藉此提醒市民，記得要定期檢查手上嘅彩票，千祈唔好將財神爺拒諸門外！