網購陷阱無日無之，但今次呢單絕對係「新界級」！近日內地有商家大呻，賣出18個充電器後，竟收到買家退回18盒沙，氣得佢決定唔靠平台，親自揸車1700公里上門對質！呢種「千里追兇」嘅決心，真係隔住個mon都聞到陣火藥味，究竟呢位無良買家下場會係點？

事主慘食死貓收18盒沙憤而跨省追兇3400公里

事緣一位內地商家，早前喺網購平台賣出18個充電器。點知好景不常，買家好快就申請退貨。商家不以為意，點知一拆開退貨包裹，當場傻眼！入面根本唔係佢嘅充電器，而係18個裝滿沙嘅包裝盒！事主大呻呢招「狸貓換太子」實在太過份，眼見隨時血本無歸，一怒之下決定靠自己！佢根據訂單地址，親自揸車往返超過3400公里，直踩上買家位於高檔住宅社區嘅屋企，誓要討回公道！

網民群起鬧爆無良買家直斥有預謀犯案

事件曝光後，大批網民替事主不值，隨即在網上群組洗版，鬧爆買家行為離譜至極！唔少人直斥：「沙都準備好，擺明係有預謀犯案啦！」、「為咗啲小便宜搞咁多嘢，真係好肉酸！」亦有網民佩服賣家嘅驚人行動力，紛紛留言：「呢位賣家執行力勁過快遞！」、「揸3400公里維權，呢啖氣真係吞唔落！」更有人踢爆，買家疑似已將騙返嚟嘅充電器掛上網轉售圖利，食相極之難睇。

買家當場嚇窒認錯道歉最終硬食天價賠償2萬元

面對賣家「尋仇式」上門，住喺高檔社區嘅買家當場嚇到腳軟，即刻低頭認錯，不斷道歉求饒：「我就是貪小便宜，請原諒我」。由於雙方爭執激烈，最終要驚動警方介入調解。經過一輪協商，買家自知理虧，最終要為自己嘅貪念埋單，向賣家賠償人民幣2萬元（約2.3萬港元），事件先至告一段落。唔少網民都話呢個結局大快人心，奉勸大家切勿因一時貪念，最終得不償失！