球場上咩奇景都有，但有球手因為失分，竟然嬲到當眾除褲你又見過未？近日德國一場網球公開賽就上演咗呢幕離奇畫面，一名世界排名第32位嘅27歲法國球手，喺比賽中失掉關鍵一分後，竟然情緒失控，喺球場中央將短褲拉到腳踝，嚇到全場觀眾O嘴，最終結局更係相當悲慘！

激戰失守情緒崩潰 27歲球手竟當眾拉低短褲洩憤

事發喺德國漢堡網球公開賽嘅男單32強賽事，由27歲法國球手穆特（Corentin Moutet）對戰26歲西班牙球手達維多維奇福基拿。戰至首盤，當時穆特以2比3落後，喺一個關鍵回合中，雖然佢奮力跑動多次救球，但最終仍然被對手以一記大角度抽擊得分。失分後嘅穆特明顯大受打擊，情緒瞬間崩潰，竟然喺眾目睽睽之下，將自己條短褲一嘢拉到落腳踝，之後仲嬲到掉爛埋支球拍，用極端行為發洩不滿。

全場觀眾嚇到O嘴尖叫 裁判即時警告違反運動精神

穆特呢個驚人舉動，即時嚇窒全場，觀眾席瞬間爆出嘩然巨響，唔少人發出驚呼，亦有人忍唔住大笑同向佢吹口哨，場面一度混亂。雖然穆特好快就將褲著返好，但佢當眾除褲嘅行為已經被視為嚴重違反運動精神，球證見狀即時向佢作出警告，以示懲戒。事件令呢場本應平平無奇嘅32強賽事，頓時成為全球網壇熱話。

發洩完都冇用 最終直落兩盤慘敗出局止步32強

不過，即使發洩完一輪，亦未能為穆特帶來好運，更扭轉唔到戰局。佢嘅情緒明顯影響咗之後嘅表現，全場處於下風，最終以4比6、4比6直落兩盤不敵對手，喺男單32強黯然出局。呢次失控嘅洩憤行為，唔單止令佢輸咗比賽，更輸埋體育精神，可以話係輸人又輸陣，下場相當悲慘。