月薪$5700筍工！36歲仔轉職「全職孫仔」朝8晚5陪阿伯玩手機 點知背後有辛酸？

筍工實況曝光每日陪阿伯散步玩手機

綜合內媒報導，呢位36歲嘅事主俞俊，本身喺縫紉廠打工，月薪僅約$4,000港元。今年過年後佢決心轉工，點知就搵到呢份「全職孫子」嘅筍工！佢每日返工時間係朝8晚5，主要工作就係陪一位91歲嘅獨居阿伯。俞俊原本以為要負責煮飯、清潔甚至處理大小二便等護理工作，但開工後發現完全唔係嗰回事！佢嘅主要任務只係陪阿伯去公園散步、傾吓偈、教佢用手機，半個月嚟最「勞動性」嘅工作，竟然只係幫手搬咗一袋10公斤重嘅米，真係聽到都覺得爽！

網民洗版勁羨慕直呼係神仙級工作

事件曝光後，大批網民替事主搵到好工而高興，更引發群組洗版！俞俊將自己嘅轉職經歷分享上網，坦言初時都擔心份工唔體面、人工低，點知竟然引嚟全網「羨慕嫉妒恨」。唔少網民鬧爆自己份工辛苦又冇前途，紛紛留言表示「呢啲工邊度搵？」、「唔止係神仙工作，仲好有意義」、「朝八晚五月薪5000，仲要唔使體力勞動，真係好過好多人」。

事主揭工作辛酸一面非人人做得嚟

正當全網羨慕之際，俞俊就大呻其實份工都有「隱性挑戰」！佢指出，呢份「神仙工作」並非表面睇咁輕鬆，首先要忍受到老人家身上嘅氣味，有時仲要處理突發嘅大小便失禁情況，絕對唔係人人頂得順。佢又提到，呢位91歲嘅阿伯其實已經喪偶超過20年，每日頻繁去公園只係為咗排解寂寞。經過長時間相處，俞俊已經將阿伯當成自己屋企人，希望用簡單嘅陪伴，令佢嘅晚年生活唔再孤單，背後原因令人心酸。