貪食惹禍！2米巨蟒潛雞舍開自助餐飽到郁唔到下場超尷尬

俗語有云「貪字得個貧」，但原來貪食都可以惹來橫禍！福建最近就發生一宗離奇事件，有「不速之客」深夜潛入民宅雞舍大開「自助餐」，點知食飽後竟然因為身軀暴脹，被困籠內動彈不得，最終要驚動消防員到場解困，場面極度尷尬，堪稱現實版「貪食蛇」！

屋主嚇破膽直擊2米巨蟒雞籠內進退兩難

事發在福建漳州，屋主詹女士憶述，當日早上準備去餵雞時，驚覺雞籠情況有異，不但雞隻數量無故減少，整個超過1米高的雞籠更異常鼓起。她鼓起勇氣走近一睇，當場嚇到魂飛魄散！籠內竟然盤踞住一條長約2米的巨蟒，個肚脹卜卜，睇嚟啱啱先飽餐一頓，成條蛇塞爆雞籠，陷入「進得來、出不去」的尷尬局面，完全郁唔到。

事件曝光後，大批網民都覺得匪夷所思，紛紛湧入留言區「食花生」，恥笑呢條為食蛇！有網民抵死留言：「呢個唔係捕食，係自助餐食到要扶牆走」、「第一次睇到蛇因為食太飽要人救」、「雞：我哋係受害者亦都係見證者」，留言區被恥笑留言徹底洗版，場面搞笑。

詹女士見狀隨即報警求助。消防人員到場後，小心翼翼處理呢位「為食賊」。經點算後，原來雞籠本來有7隻雞，其中1隻已經慘被巨蟒吞落肚，另有1隻被咬死，其餘5隻雞僥倖逃過一劫。最終，消防員成功將呢條重達17.5斤的巨蟒安全移出，並帶到野外放生，事件才告一段落。