日日返工做到隻積咁，相信唔少打工仔都發夢想過，可以劈炮唔撈環遊世界！美國有對年輕情侶就將夢想付諸實行，仲要「升呢」到邊旅行邊創業，結果竟然喺短短1年內，靠一個簡單念頭狂賺超過2.6億港元，實現真正嘅財富自由！不過，呢個羨煞旁人嘅故事，結局竟然有神反轉？

登山意外啟發商機靠牛脂防曬品發達

呢個「人生勝利組」故事始於2023年，事主Tricia同男友Max去非洲挑戰攀登吉力馬札羅山，點知Max因為搵唔到啱用又唔刺激皮膚嘅防曬產品而苦惱。就係呢個小插曲，竟然啟發佢哋返美國後，研發以「牛脂」（tallow）為基礎嘅天然防曬霜。兩人更加喺租約期滿後，索性唔再租樓，帶住創業夢展開「數碼遊牧」生活，第一站就飛去夏威夷，一邊享受陽光與海灘，一邊遙距經營生意，估唔到產品銷情極速起飛，為佢哋嘅旅程賺到第一桶金！

奢華生活曝光網民羨慕又妒忌

事件曝光後，大批網民睇到佢哋嘅經歷都羨慕到爆！試諗下，當你仲喺Office對住四面牆，人哋已經喺夏威夷嘅Airbnb、由邁阿密出發嘅豪華郵輪上開緊工，之後仲玩勻全歐洲。佢哋分工清晰，一個主理市場推廣，一個專注廣告投放，寓工作於娛樂，仲順便考察歐洲、日韓嘅產品設計，令自家品牌不斷優化。唔少網民大呻「人比人，比死人」、「呢啲先係生活」、「我哋只係生存」，認為佢哋嘅生活方式簡直係所有打工仔嘅終極夢想。

狂賺2.6億後坦言頂唔順結局神反轉

正當全世界都以為佢哋會一路玩一路賺錢，享受無盡嘅自由時，呢對情侶喺環遊世界1年、公司年銷售額衝破3300萬美元（約2.6億港元）後，竟然坦言「頂唔順」！佢哋承認，長期無固定居所、不斷移動嘅生活模式其實極度消耗精力，令人身心俱疲。雖然呢段經歷令佢哋嘅品牌極速成長，但佢哋決定結束呢種「夢幻生活」，返回美國定居，重新建立穩定嘅生活節奏。呢個結局話俾大家知，即使係人人稱羨嘅生活，背後都有不為人知嘅辛酸！