中逾百萬美金巨獎！打工妹扮窮繼續揸Uber 瞞足半年原因曝光惹議

女事主自爆瞞住家人扮窮 半年狂做兩份工真相超心酸

事主日前喺論壇Reddit自爆，自己出身清寒，半年前意外買中彩票，一躍成為擁有逾百萬美元獎金的富翁。但佢並無辭職享受人生，反而繼續做月薪僅約2,850美元（約2.2萬港元）嘅正職，放工仲要兼職開Uber幫補家計。佢大呻生活幾乎無變，「洗頭水都仲係喺一蚊店買」。佢唯一嘅「炫富」，就係靜靜雞幫屋企人畀雜貨費同租金，更豪擲3萬美元（約24萬港元）一次過full pay買新車送畀家人。由於佢比以前更努力工作，屋企人完全無起疑，以為架車係佢死慳死抵儲錢買返嚟，完全唔知佢已經係個百萬富翁。

事件曝光後網民反應兩極 有人鬧爆佢霸佔社會資源

事件喺論壇曝光後，隨即引發網民洗版式討論，反應相當兩極。唔少網民都力撐事主保持低調嘅做法，認為「一個字都唔好講，包括你阿媽」、「一旦畀人知道咗，啲錢洗晒之前你都唔會有安寧」。但亦有大批網民鬧爆佢嘅行為，認為佢明明已經發達，就唔應該再同其他人爭飯碗，「好多人活得好辛苦，你卻霸佔別人嘅工作機會」，更有人直斥佢應該盡快搬出公共住宅，「將間屋留畀有需要嘅人啦！」。

事主首度公開背後苦衷 全因家人一個致命缺點

面對網民嘅爭議，事主亦坦言自己嘅苦衷。佢表示遲遲唔敢公開中獎消息，全因擔心家人嘅理財能力：「我好愛我嘅屋企人，但係我哋都唔係好識理財。」佢更心酸憶述：「我見過佢哋每兩個禮拜就將成份糧用嚟上網亂買嘢。」事主認為必須先等家人建立正確嘅財務觀念，先可以坦白一切。佢表示未來嘅夢想係用呢筆錢為家人買間舒適嘅屋，等媽媽可以退休安享晚年，脫離公共住宅生活，自己亦希望有機會環遊世界。呢個充滿愛但又現實嘅煩惱，實在令人感慨。