父親節對每位爸爸嚟講都意義重大，不過河南周口一位張姓人夫，今年嘅父親節就收到一份畢生難忘嘅「超級大禮」！佢嘅太太喺當日順利誕下3男1女四胞胎，令佢又驚又喜，更感動直呼：「這是上天給我的禮物！」
驚喜懷上4胞胎夫妻憂心忡忡驚早產
事主張先生透露，當初得知太太懷上四胞胎時，心情既興奮又擔心。畢竟多胎妊娠風險極高，尤其容易早產，對媽媽同BB都係一個巨大考驗。幸好太太非常堅強，一路堅持到懷孕超過36周先分娩，為BB嘅健康打下重要基礎。張先生坦言，產前因為家族「基因比較強大」，一度好擔心會一次過迎來4個仔，壓力真係唔細。
醫院出動逾20人團隊迎接萬分之一奇蹟
由於四胞胎妊娠極為罕見，發生機率低於萬分之一，河南省婦幼保健院對此高度重視。為確保母子平安，院方特別喺手術室安排咗超過20名醫護人員候命，更誇張到為每名即將出世嘅BB都配置咗一組獨立嘅搶救團隊，全程為呢個「奇蹟」保駕護航，場面相當大陣仗！
3男1女順利誕生人夫最開心係呢件事
最終，4名BB順利出世，老大重約1900克，老二約2200克，而排行第三嘅女嬰同老四就各重約2050克，體重穩定。當張先生知道結果係3男1女時，開心到不得了，笑言全家都非常高興，總算唔係「全男班」。佢難掩喜悅咁表示，呢份絕對係最特別嘅父親節禮物，以後要更加努力工作養家！
