近年唔少年輕人都想做KOL、YouTuber，貪工作夠自由又光鮮亮麗。但深圳一位「00後」少女竟然反其道而行，揀咗一份大部分人都敬而遠之嘅「厭惡性」行業，日日面對冰冷遺體，為逝者化上最後妝容。佢唔單止要克服巨大心理壓力，仲要面對外界嘅奇異眼光同偏見，背後嘅辛酸故事曝光後，即刻引起全城熱議！
毅然揀選殯葬專業無懼家人反對眼光
呢位化名劉伶嘅00後少女，當年高考揀科時，當身邊同學個個都揀熱門嘅護理、英文系，佢就偏偏揀咗「現代殯葬技術與管理」，嚇親唔少人！佢父母當時都大力反對，想佢揀份「體面啲」嘅工，但劉伶就堅持己見，認為自己性格鍾意獨處，呢行反而更啱自己。佢坦言：「與其做份冇興趣嘅工，不如揀條自己想行嘅路！」初入行實習時，佢第一次面對仲有體溫、但已無生命跡象嘅遺體，都嚇到唔敢郁，但憑住份堅持，慢慢克服恐懼，仲處理過車禍、墮樓甚至火災後嘅遺體，專業精神令人佩服。
面對職業偏見坦言靠雙手工作不丟人
事件曝光後，大批網民都激讚事主有勇氣，但亦有人表示難以理解。劉伶就大方分享行內辛酸，直言社會偏見依然存在。佢試過Call車去殯儀館，個司機一聽到目的地就即刻Cut單拒載；親戚朋友問起做咩工，佢都只能含糊其辭，甚至要自覺避開婚禮呢啲喜慶場合，廢事「唔老利」。面對種種奇異眼光，劉伶就一句KO：「能陪著逝者走到生命最後一站，係其他工作畀唔到嘅價值感」、「靠雙手工作，冇咩可丟人嘅！」霸氣回應獲網民力撐！
工作外反差極大靠Cosplay跳舞平衡生活
雖然工作環境嚴肅又悲傷，但劉伶嘅私生活原來充滿色彩，反差極大！為咗平衡心理，佢放工後會返屋企照顧貓貓狗狗，得閒仲會去玩Cosplay、睇動漫展，甚至走去學跳K-Pop，用滿滿嘅活力同興趣為自己「充電」。工作3年，見盡無數生離死別，令佢更珍惜當下，希望將來可以推動更有溫度嘅殯葬服務，用專業安慰家屬，等逝者可以體面咁走完最後一程。
