野豬問題近年備受關注，但處理方法來來去去都係嗰幾招。不過，最近外國竟然上演一幕超現實嘅「機械人大戰野豬」！有影片影到，波蘭街頭深夜有3隻野豬橫行，點知下一秒竟然有個人形機械人高速追趕，嚇到啲野豬雞飛狗走，場面震撼程度堪比科幻電影，影片一出即時喺網上瘋傳！

深夜停車場上演世紀追逐戰人形機械人身手超靈活

事發喺4月13日波蘭首都華沙一個停車場，從網上瘋傳嘅影片可見，3隻野豬喺深夜時分闖入停車場範圍內慌忙奔跑。正當大家以為又係普通嘅野豬滋擾事件時，畫面突然出現一部人形機械人，以極快速度喺後面窮追不捨！機械人動作異常靈活，完全唔似我哋平時想像中咁笨重，3隻野豬被嚇到魂飛魄散，最終狂奔逃入旁邊嘅漆黑樹林，先至成功甩難。

影片瘋傳網民睇到O嘴驚呼未來世界已經降臨

事件影片在網上曝光後，隨即被瘋傳兼引發群組洗版，大批網民對眼前景象感到難以置信！唔少人驚嘆科技發展一日千里，留言話「野豬闖入居民區聽起來像是100年前的事，但被機械人趕走卻像是100年後的未來」、「以為睇緊《未來戰士》」、「呢個驅趕方法又環保又高效」。亦有網民錯重點，笑指機械人嘅跑姿非常搞笑，似足趕返工嘅打工仔。

機械人真實身份曝光結局神展開原來係宣傳片

正當全城熱議之際，呢位「機械人英雄」嘅身份亦被極速起底。原來佢係由中國企業「宇樹科技」研發嘅G1型人形機械人，名叫「Edward Warchocki」。而最令人意想不到嘅係，影片中機械人追趕完野豬後，竟然停低腳步，仲向住野豬逃走嘅方向舉手揮手道別，場面非常滑稽！據悉，呢段影片其實係該公司嘅市場宣傳策略之一，估唔到成功製造出驚人嘅網絡熱話，宣傳效果滿分！