東鐵頭等驚見奇景！少女扮瞓BB車疑呃車費 港女出聲反被惡父鬧爆：我每次都這樣！

港女睇唔過眼出聲反被鬧爆 惡父理直氣壯：哪有問題！

事主在網上大呻，指當晚收工乘坐東鐵頭等車廂，見到一對內地夫婦將BB車泊於通道中央，但車內瞓住的竟是一名「目測7至10歲女」。該女童身穿短裙更高舉雙腳，導致「成條唔知底褲定打底褲外露」，畫面極之尷尬。事主於是好心提醒對方「唔好咁泊車」，建議移到旁邊的傷殘人士位置，豈料同行男子竟阻止妻子，更理直氣壯大鬧：「不要理她！我每次都這樣放，哪有問題！你給我坐下！」事主指自己全程被該男子「怒睥」，而對方手抱的嬰兒亦不斷狂叫。事主再向媽媽表示其女兒走光，對方卻不停指「打底褲來沒問題」，完全懶理，令事主極度眼冤。

網民洗版怒轟父母離譜行為 揭扮瞓真相：為慳頭等車費

事件曝光後，帖文立即被網民洗版，大批網民鬧爆該對夫婦的行為離譜！事主其後補充，懷疑這家人是為了慳錢才出此下策：「應該係無畀頭等車費扮瞓BB車搏大懵」，更透露留意到「個老母成程不停隔住個罩同個女悄悄話」，認為女童根本是假扮熟睡。不少眼利網民根據相片分析，直指女童的真實年齡可能更大：「睇到笑左出黎，話佢16歲都唔過分，對鞋都係成人size」、「訓bb車個唔止十歲囉，咁既打扮同對鞋咁大，14歲都有」，一面倒怒轟該對父母的自私行為，更質疑其家教方式。

事主慨嘆港人冷漠視而不見 竟有網民反撐：放鬆啲啦香港人

除了該家人的行為，事主亦對車廂內其他乘客的反應感到心寒。她慨嘆：「可悲喺左右隔籬全部扮睇唔到聽唔到，有個阿伯行到唔穩寧願攝住過都唔出聲！」直言這種視而不見的態度，正正就是「香港愈來愈差」的原因。雖然大部分網民都支持事主發聲，但亦有少數網民持相反意見，認為事主小題大做：「BB車放大人旁邊係好正常，大女冇位坐，bb可以抱，讓個Bb車比大女坐都係好合理既事」，更勸籲「放鬆啲啦香港人，咁小事唔洗公審人既」，言論再次引發另一輪爭議。