結婚係唔少人嘅人生目標，但如果擇偶條件太離地，分分鐘變成長跑！日本就有一位35歲OL，為咗搵個如意郎君，竟然花足11年時間，前後見咗超過300個男人，戰績驚人！但點解見咁多個都仲係單身？佢開出嘅「天價」條件，可能就係答案，而佢最近「含淚」讓步後嘅一番言論，更係引發熱議！

事主自爆擇偶天花板級條件堅持非千萬年薪帥哥不嫁

呢位化名明日香嘅35歲日本OL，自身年收入約300萬日圓（約15萬港元），但佢過去11年嚟，一直透過交友App尋覓真命天子。佢喺訪問中大方承認，自己嘅擇偶條件極之嚴格，目標只有一個：必須係年收入超過1000萬日圓（約49萬港元）嘅「高價值帥哥」，其他人一概免問！佢甚至講到明：「只要對方到40多歲後，年收入能到1000萬就好」。正因為呢個堅定不移嘅高門檻，令佢喺相睇市場打滾足足11年，見面人數超過300人後，依然名花無主。

含淚降低門檻仍覺委屈自言已作出極大讓步

尋覓對象超過十年都未有著落，明日香最終決定「略為下調」門檻，將年收入要求由1000萬日圓降至800萬日圓（約40萬港元）。點知見多約10個男人後，佢依然覺得難有共鳴。對此，明日香坦言內心勁委屈，認為自己已經作出相當大嘅讓步：「我覺得自己係咪有啲妥協咗？我已經好努力、好忍耐，也做得很好了。」佢解釋，堅持高收入係因為婚後唔打算再工作，希望做全職主婦，如果對方收入唔夠，就難以維持買化妝品等基本生活品質。而且，佢強調對外貌同埋年齡絕不退讓，理想對象要比自己年輕2至3歲，理由係「結婚時嘅年齡係改唔到嘅，所以只有年齡呢點我唔可以退讓」。

婚姻專家拆解失敗關鍵點出殘酷現實婚姻並非單向選擇

事件曝光後，有專家及官方數據就點出殘酷現實。根據日本內閣府一項調查，如果35歲以下女性肯喺年齡、收入、學歷或身高等條件中放寬任何一項，配對成功率就可以提升約3倍！婚姻介紹所代表三島光世更一針見血指出，當擇偶條件開得太多，對方亦會反向審視你嘅條件。佢強調，婚姻關係並非單向選擇，唔係單純滿足個人期望就得，而係需要建立喺雙方都願意結婚嘅基礎之上。