打工仔日日呻返工辛苦，但又有幾多人夠膽放棄穩定職業追夢？最近日本一位24歲靚女護士就毅然辭職，放棄高薪厚職，竟然選擇返屋企舖頭幫手，每日親手密密做烏冬！估唔到呢個決定，反而令佢一夜爆紅，社交平台狂吸超過21萬粉絲，更被網民大讚有做偶像嘅潛質，究竟係咩驅使佢有咁大轉變？

放棄護士穩定工作繼承父業！一個原因決心轉行

事件主角係24歲嘅竹內綾音（Ayane Takeuchi），佢喺高中畢業後就去咗大阪讀護理學校，之後順利成為綜合醫院護士。本來前途一片光明，但轉捩點就喺2025年2月，佢經營4間拉麵店嘅爸爸決定再開一間手打烏冬店「手打うどん ごだいさん」。綾音起初只係放假去幫手，點知慢慢被店內充滿笑容同活力嘅氣氛打動，對比返醫院高壓嘅工作環境，令佢毅然決定辭職，同爸爸提出想全職喺烏冬店工作。據綾音憶述，爸爸聽到後表現得非常開心，但媽媽初時就有啲懷疑，仲以為個女係被爸爸「夾硬拉去」幫手！

手打烏冬片網上瘋傳！網民洗版激讚：以為係Model

事件曝光後，大批網民都對綾音嘅決定同美貌感到驚訝！事源有食客將佢認真製作烏冬嘅影片放上網，結果意外引發瘋傳，令佢人氣急升！綾音嘅Instagram粉絲數瞬間衝破21萬，連TikTok都有超過15萬人追蹤，相關影片觀看次數更累積突破2800萬次，人氣極之驚人！影片喺網上被洗版，唔少網民都留言激讚：「以為係模特兒」、「可以直接做乃木坂46 Center！」，仙氣外貌加上專業嘅職人精神，成功俘虜大批粉絲。

小店變身遊客朝聖地！招牌烏冬最平$34有交易

綾音嘅爆紅，令「手打うどん ごだいさん」呢間小店，搖身一變成為日本岐阜縣嘅人氣景點，唔少日本國內外嘅遊客都專程去朝聖，希望可以一睹「美女烏冬職人」嘅風采，兼品嚐一碗誠意十足嘅手打烏冬。據知店舖招牌清湯烏冬只係賣700日圓（約34港元），最貴嘅肉烏冬都只係900日圓（約44港元），非常抵食。綾音本人就最推薦喺肉烏冬上面加蛋花同炸年糕，呢個私房食法亦深受當地食客歡迎，下次有機會去岐阜真係要去試下！