正所謂「人不可以貌相」，有時候外表太年輕都可能係一種「甜蜜的煩惱」！最近日本就有一位女模特兒，因為一身打扮實在太過減齡，興高采烈去人氣居酒屋準備大快朵頤之際，竟然在門口就被店員當成未成年少女截停，要求出示身份證明，場面一度十分尷尬！事主隨後在社交平台分享呢次奇遇，更自爆真實年齡，結局神反轉令一眾網民嘖嘖稱奇！

40歲女模初訪人氣居酒屋竟被當未成年人攔截

事件主角係日本蘿莉協會會長兼知名模特兒青木美沙子，雖然已經年過40，但保養得宜，加上鍾情蘿莉（Lolita）風格打扮，外表完全睇唔出真實年齡。日前佢就喺社交平台分享，話自己一直好想試吓連鎖居酒屋「鳥貴族」，於是就約埋兩位同樣著住蘿莉裝嘅朋友一齊去朝聖。點知一行人滿心歡喜去到門口，就即刻被店員攔住，仲好認真咁要求佢哋出示證件，以確認係咪已經夠秤飲酒，令佢哋當場呆咗，哭笑不得。

事主自爆真實年齡網民激讚最強童顏女神

面對店員一臉嚴肅嘅查證要求，青木美沙子非但冇嬲，反而覺得又好氣又好笑，忍唔住同店員講：「我都40多歲了！」相信店員聽到呢個答案都嚇咗一跳！事主推測，應該係因為自己同朋友當日嘅蘿莉服裝太有少女感，先會引起呢場美麗嘅誤會。事件曝光後，影片隨即引發網民熱議，唔少網民都大讚事主保養得太好，完全係「最強童顏女神」，仲話「呢個樣話20歲都有人信」、「店員嘅反應先係正常」、「證明Lolita裝真係最強減齡神器」。

烏龍事件無損雅興點名大讚1款美食超滿足

雖然發生咗呢段小插曲，但完全無損青木美沙子嘅雅興。佢透露自己其實酒量唔好，所以當日只係點咗烏龍茶配餐。不過佢依然非常享受成個用餐體驗，仲特登點咗YouTuber推薦嘅山藥鐵板燒，大讚味道出色，終於圓咗多年嚟嘅「打卡」心願。佢仲話對呢間居酒屋嘅初體驗感到非常滿意，呢次尷尬又有趣嘅經歷，亦成為佢同粉絲之間一個津津樂道嘅話題。