去旅行最怕就係中伏，尤其喺日本以為求其食餐壽司好穩陣，點知隨時荷包大出血！最近有位日本網民喺機場醫肚，點知食一貫壽司竟然要成7,500円（約$400港紙）！事主埋單一刻當場嚇呆，將經歷放上網大呻，點知結局竟然神反轉，引嚟大批網民羨慕！

事主機場醫肚點蝦壽司師傅詭異提問藏玄機

事主日前喺社交平台X大呻，話自己喺北海道機場一間立食壽司店，諗住求其食幾件壽司當點心。當佢點咗一款餐牌寫住「エビ（蝦）」嘅壽司後，師傅竟然好客氣咁問佢：「需要啲時間準備，可以嗎？」、「握之前要唔要影相？」。事主當下雖然覺得有啲奇怪，但都冇諗太多。點知到埋單一刻，見到張單顯示嗰一貫蝦壽司竟然索價7,500円，先知自己「誤打誤撞」食咗天價壽司，仲話如果早知個價錢，自己都未必會點！

事件曝光網民洗版非議事主反而羨慕食到幻之蝦

事件曝光後，本以為網民會替事主不值，鬧爆店家劏客，點知風向竟然180度大逆轉！大批網民湧入留言區洗版，紛紛表示「好羨慕！」、「簡直係天賜良機！」、「呢個價錢食到絕對係賺咗！」。原來事主食到嘅並唔係普通蝦，而係被譽為「幻之蝦」嘅葡萄蝦！有網民就分享：「即使係我呢個祖輩都係漁民嘅壽司專家，一世人都只係食過兩次葡萄蝦」、「呢種體驗有錢都未必買到」，完全冇人覺得事主被當水魚，反而個個都話佢好彩！

天價壽司真身揭曉原來係北海道產量極少幻之蝦

原來，呢款索價近$400港紙一貫嘅「葡萄蝦」，係北海道羅臼一帶產量極稀少嘅漁獲，捕撈季節極短，所以先被稱為「幻之蝦」，屬於高級珍味。有內行網民就分析，壽司師傅當時嘅「奇怪問題」，其實係一種非常含蓄嘅善意提醒，暗示食材極之矜貴，畀多次機會客人考慮。事主雖然硬食咗天價壽司，但就意外獲得一次難得嘅美食體驗，可以話係不幸中嘅大幸！