港人熱愛「返鄉下」去日本旅行，尤其喜歡到訪古色古香的寺廟、庭園打卡。不過，下次見到路中心有舊用繩綁住嘅石頭，就千萬唔好亂掂亂闖！最近有日本網民發帖，揭開一個遊客極易誤會的「禁忌」，原來這塊平平無奇的石頭，竟是個「禁止進入」的結界，背後真相嚇壞超過300萬網民，不少人更自爆差點就出事！

驚！神秘綁繩石非裝飾品實為結界

事件源於一位熱愛日本民俗歷史的網民「すぽんちゅ」，在社交平台X分享了一張京都南禪寺內的照片。相中可見，一塊石頭被黑繩綁成十字狀，靜靜地放在石橋中央。相信不少遊客見到，只會以為是日式庭園的裝飾品。但「すぽんちゅ」就大爆，這種石頭名為「止步石」（止め石）或「關守石」（関守石），源自日本茶道文化，其實是一個極度委婉的警告，意思係「此路不通，請勿再往前行」！換言之，石頭後面嘅區域係私人地方，唔想你行入去。

網民嚇到腳軟自爆差啲亂掂出事

帖文一出，即時引發群組洗版，至今已累積超過300萬次瀏覽！大批網民，特別是外國遊客，都嚇到腳軟，紛紛留言表示自己完全唔知情。「我一直以為是紀念品，還在想說怎麼綁」、「如果唔係睇到呢篇文，我好可能會無視佢繼續行」、「比起警告，更似係詛咒」、「裡面其實是結界吧？領域展開！」不少人更直言，下次去日本一定會加倍小心，以免誤闖禁地，破壞規矩都唔知。

升級版心機石暗藏核武級破壞力

有網民更聯想到日本街頭常見的「心機石」（いけず石），即係啲屋主放喺牆角，用嚟防止車輛撞牆嘅大石。帖主「すぽんちゅ」亦幽默地形容，呢類石頭就好似民間版「核武器」，因為車輛一旦硬闖，隨時車毀牆裂，造成「兩敗俱傷」的局面。無論是寺廟的「止步石」還是民居的「心機石」，都體現了日本人含蓄又帶點「骨氣」的溝通方式，下次遊日見到真係要醒目啲喇！