課金$480潛水標榜「兒童都能玩」！港男慘遭3米巨鯊噬頭留9血洞 園方冷血處理手法曝光

標榜兒童都能玩 事主落水20秒即遭巨鯊噬頭

事主包先生怒訴，當日佢同太太去「長沙湘江海洋王國」，見到一個叫「藍洞獵奇」嘅潛水項目，現場螢幕不停播住教練帶細路潛水嘅宣傳片，職員更拍心口保證「絕對安全，細路都玩得」。事主不虞有詐，即時課金人民幣480元（約港幣$520）體驗，點知呢個決定竟令佢畢生難忘！當佢跟隨指引下潛到水下僅1、2米深時，一條長達3米嘅沙虎鯊突然高速衝埋身，張開血盤大口就向佢頭部狂噬，整個過程唔夠20秒，事主形容當時嚇到魂飛魄散！更令人心寒嘅係，佢受傷後，水底職員竟然仲打手勢問佢「係咪要繼續潛」，簡直匪夷所思！

事件曝光網民鬧爆 園方罔顧人命翌日照常營業

事件曝光後，大批網民替事主不值，群起公審園方草菅人命！網民鬧爆園方嘅安全措施形同虛設，「3米長鯊魚喎！點會俾遊客咁近距離接觸？」、「職員仲問繼唔繼續？係咪傻咗？」、「標榜兒童可玩，如果今次係細路仔，後果不堪設想！」最令網民震怒嘅係，事主指控園方喺意外發生第二日，竟然當無事發生過，涉事潛水項目繼續照常開放營業，完全罔顧其他遊客嘅生命安全，處理手法令人髮指！

頭臉留9處深齒痕恐毀容 園方僅賠$2萬惹事主不滿

事主被救上水後緊急送院，經診斷證實頭部及臉部共有9處由鯊魚造成嘅深層齒痕，經過一個月治療，傷口附近仍有明顯塌陷，縫針處更可能永久無法長出頭髮，變相毀容，醫生建議佢必須休養3個月。雖然園方當下有墊付醫藥費，但事主大呻園方後續態度極度消極，只肯賠償區區人民幣2萬元（約港幣$21,800），完全無法彌補佢嘅身心創傷。直至事件鬧大，園方日前先回應指，目前正與事主協商，而涉事嘅「藍洞獵奇」潛水項目亦已暫時停業整頓。