唔少人去旅行搭飛機，都鍾意揀窗口位，貪可以睇靚景兼打卡，又或者挨住窗邊瞓覺。但原來呢個「最佳座位」暗藏健康殺機！最近有研究驚爆，高空嘅紫外線強度遠超你想像，坐窗口位短短一個鐘，對皮膚嘅傷害竟然等同喺太陽燈機曝曬20分鐘，絕對唔可以睇少！

研究驚揭高空紫外線勁多4倍坐窗口位隨時中招

根據外國多項研究指出，飛機飛行高度嘅紫外線強度，可以比地面高出整整3至4倍！更恐怖嘅係，雖然飛機窗可以阻擋大部分導致曬傷嘅UVB，但對於可以深入皮膚、引致老化甚至皮膚癌嘅UVA，卻未必能夠完全阻隔。有數據顯示，高空嘅UVA強度甚至比地面高出三倍。空姐Aislinn Swain亦喺社交平台分享，喺短途機坐窗口位60分鐘，所吸收到嘅紫外線輻射量，就等於喺室內太陽燈床曬足20分鐘，難怪有機師同機艙服務員患上黑色素瘤嘅風險會比一般人高！

專家教路登機前必做一步長途機隔2小時要補搽

事件曝光後，大批網民都話以後唔敢再坐窗口位。其實又唔使太驚，只要做足防護措施就無有怕！美國皮膚科醫學會就教路，最基本係喺登機前15分鐘搽定防曬，因為防曬產品需要時間先可以發揮作用，千祈唔好等到落機先嚟補救。保養專家Alexis Robertson更提醒，如果係搭長途機，由於機艙空氣乾燥會令防曬效果減弱，建議每隔1至2個鐘就要補搽一次，先可以維持足夠嘅保護力。

物理防曬更可靠遮光板最實際專家提醒4大身體部位勿忽略

除咗搽防曬，專家亦建議可以著UPF50+嘅長袖衫褲，物理遮擋遠比防曬產品更持久可靠。同時，為保護眼睛免受傷害，最好佩戴可以100%阻隔紫外線嘅太陽眼鏡。另外，搽防曬時唔好淨係顧住塊面，好似耳朵、腳背、嘴唇呢啲容易忽略嘅位置都要搽勻！美國皮膚科醫學會建議，可以用SPF30或以上嘅潤唇膏保護雙唇。當然，最直接嘅方法就係拉低遮光板，直接將陽光隔絕，咁就萬無一失啦！