去旅行見識過唔少靚景，但你有冇諗過連公共廁所都可以成為一個「景點」？最近喺甘肅敦煌，就有一個公廁喺網上爆紅，奢華程度令人咋舌，唔單止外觀設計感十足，內部設施更係誇張到吸引大批遊客專程去「朝聖」打卡，甚至將佢列入必去行程，究竟有幾巴閉？

敦煌30年舊建築大變身玻璃幕牆配壁畫超誇張

呢個名為「敦煌淨界」嘅主題公廁，位於敦煌夜市北門附近，前身係一棟有近30年歷史嘅舊建築。經過當地文旅單位同企業合作改造後，可以話係脫胎換骨！公廁外牆採用超白玻璃幕牆設計，充滿現代感，同周邊街景形成強烈對比。而內部更加驚人，設計融入大量敦煌文化元素，唔單止有石窟風格同壁畫裝飾，仲有綠色植物同香氛，完全顛覆你對公廁嘅想像！

網民洗版熱議變打卡景點遊客驚訝列入必去行程

事件曝光後，大批網民喺社交平台洗版式討論，形容呢個公廁靚到唔似一個廁所，反而更似一個藝術館或者打卡景點！唔少遊客睇到網上嘅分享之後，都特登專程去參觀，仲話要將呢個「網紅廁所」加入敦煌旅遊行程之一。自從舊年8月啟用以嚟，呢度已經成為當地一個另類嘅觀光熱話，成功帶動討論度。

官方解構2層高豪華內部母嬰室咖啡機服務超貼心

據官方工作人員介紹，呢個公廁總共有兩層，一樓以「莫高至善」為主題，二樓就以「雅丹秘境」為概念，營造出奇幻嘅空間感。除咗設計煞食，內部設施亦非常貼心，唔單止有母嬰室、兒童安全設備等親子及無障礙空間，二樓竟然仲有咖啡機同埋行李寄存服務！呢個升級改造項目，唔單止提升咗旅客體驗，更成功為被評為國家3A級旅遊景區嘅敦煌夜市帶嚟更多人流，成為當地新焦點。