神奇女俠駕到？麵館午市零生意女子入座數分鐘後結局神反轉

出街食飯最怕等位，但有時見到餐廳「吉舖」一間，又會擔心係「伏」唔敢入。近日，內地四川成都一間麵館就上演咗極為神奇嘅一幕，事發時店內明明一個客人都無，點知一位年輕女子入座後短短幾分鐘，成間舖竟然瞬間爆滿，離奇畫面喺網上曝光後，隨即引起網民熱烈討論！

麵館午市拍烏蠅無人問津女子入座數分鐘後竟瞬間爆滿

事發喺當日下午1時左右，正值午市尾聲，一間麵館內卻異常冷清，老闆娘面對空蕩蕩嘅店面顯得相當無奈，只能喺門口四處張望，似乎擔心緊當日生意。就在此時，一名年輕女子施施然走入店內，準備用餐。點知神奇嘅事就喺佢拎起餐牌研究嗰刻發生！短短數分鐘之內，客人竟然好似潮水咁湧入，有啲自己一個嚟，有啲就成班朋友一齊，原本冷清嘅麵館瞬間變得熱鬧非凡，所有座位好快就被坐滿，令老闆娘當場睇到目瞪口呆。

老闆娘驚呆封「旺店錦鯉」網民洗版熱議：我都有呢種體質

事件曝光後，大批網民都覺得難以置信。麵館老闆娘事後將店內嘅閉路電視片段分享上網，又忍唔住笑稱該名女子根本係「旺店錦鯉」，彷彿自帶「吸客體質」，只要一入舖頭，就能夠招嚟大批顧客。影片隨即引發網民洗版式討論，唔少人更分享自己都有類似經歷：「我好似都係呢種體質，去邊間舖頭都突然變多人」、「每次見到舖頭冇人我就敢入去，結果後面即刻排隊」、「個女仔自帶吸客Buff，一入舖就客滿」、「呢種人應該收代言費，根本係活招牌」。