情侶之間最重要就係信任，但如果發現另一半嘅真面目同佢平時嘅形象差天共地，你又會點做？最近有位台灣女網民就經歷咗呢場信任危機。佢喺男友屋企無意中發現對方嘅社交平台觀看紀錄，內容竟然同性交易、約砲攻略有關，同男友平日自稱「絕世好盤」嘅形象大相逕庭，令佢大受打擊，更萌生分手念頭！

男友自詡絕世好男人 社交平台驚揭5個月恐怖召妓攻略

事主大呻，早前到男友家過夜，對方同朋友外出後，佢獨自碌社交平台，點知首頁竟然瘋狂推薦帶有情色意味嘅影片。事主好奇心驅使下，一查觀看紀錄即刻嚇親！原來喺大約5、6個月前，男友曾海量搜尋「泰國泡泡浴攻略」、「老司機帶你探訪泰國性交易」等影片，仲有大量關於「國外搭訕辣妹」同「約砲攻略」嘅內容。最諷刺嘅係，男友平時不斷強調自己係「不煙不酒不嫖」嘅好男人，如今呢啲恐怖鐵證令事主不禁懷疑，男友舊年話朋友約去泰國，如果真係成行，後果會唔會不堪設想？

網民群起公審力數罪狀 怒轟偽君子：真正好男人唔會掛喺嘴邊

事件曝光後，隨即在網上引發熱議，大批網民替事主不值，更群起公審呢位「偽君子」男友！網民鬧爆：「冇小題大作，就係噁男」、「真正嘅好男人先唔會一直強調自己係好男人」、「有睇呢啲又提過要去泰國玩，根本喺度做攻略，好噁心！」亦有網民一針見血指出，潔身自愛本應係基本，唔需要掛喺嘴邊當成優點：「不煙不酒不嫖就棒了？不是最基本的嗎？」、「不嫖的男生並不是少數，我覺得反而是少數噁男想要把自己行為正常化而已」。

非首次斷正曾開小帳號睇女 事主心死反胃萌生分手念頭

更令事主心寒嘅係，呢件事並非單一事件。事主憶述，男友本身就鍾意睇網紅或者衣著清涼嘅女性相，之前更被斷正擁有一個「小帳號」專門追蹤呢類「擦邊」內容！當時男友被揭發後，雖然即刻刪除帳號兼道歉，但就辯稱「只是看看而已」，認為男生對此好奇好正常。如今新仇舊恨加埋，事主坦言心情已徹底改變，甚至感到噁心反胃，不禁問：「是我太小題大作了嗎？」呢段關係睇嚟已經岌岌可危。