剪頭髮剪到一肚氣，相信唔少人都試過，最多都係上網公審或者畀個劣評。不過，如果剪衰咗個頭，你會唔會嬲到想攞人命？巴西最近就發生一單恐怖血案，一名27歲女子因為不滿新髮型，竟然持刀直闖髮廊，在光天化日之下，一刀捅向髮型師背脊！成個過程更被CCTV全程直擊，畫面極度駭人！

剪髮後突反口由好評變死亡威脅

事件要由4月7日講起，27歲女事主拉伊斯（Laís）到髮廊搵29歲髮型師愛德華多（Eduardo）做挑染同護髮。當時佢離開時看似相當滿意，事後更喺社交平台畀好評。點知幾日之後，佢態度180度大轉變，開始瘋狂投訴，大呻髮型師「亂打薄」佢啲頭髮，搞到個劉海好似漫畫角色咁樣衰，並多次要求退款。喺退款要求被拒絕後，佢更被指曾發出死亡威脅，為之後嘅血案埋下伏線。

CCTV直擊光天化日背後偷襲過程

去到5月5日下午，拉伊斯再次上門理論，但退款依然不果。店內CCTV畫面見到，佢竟然默默行到正在為其他客人服務嘅髮型師身後，然後喺手袋攞出一把利刀，二話不說就向對方背部捅落去！幸好髮型師反應快即時避開，店內保安亦火速上前將佢制伏，成功奪走兇器，否則後果不堪設想。整個過程快到冇人反應得切，場面非常驚險。

律師不滿控罪要求改控殺人未遂

警方接報到場後，以傷害及恐嚇罪當場拘捕拉伊斯。髮型師愛德華多背部受傷，幸好傷勢輕微，送院治理後已無生命危險。不過，事件並未就此平息。愛德華多嘅法律團隊對當局嘅處理手法大感不滿，律師指出，疑犯事前已有死亡威脅，加上係持刀從背後施襲，行為性質嚴重，根本唔應該只係控告普通傷害罪，而係應該根據巴西《刑法》第121條，將案件定性為更嚴重嘅「殺人未遂」。