近期收藏界熱話，絕對係瑞士一位年僅20歲嘅少女！佢由細儲到大嘅寶可夢卡，數量竟然多達6萬張，專家估算總值超過5.2億港元，數字驚人到有望刷新健力士世界紀錄！消息一出，唔單止令一眾卡牌迷嘩然，更因為呢批天價收藏，令少女全家提心吊膽，引發後續一連串意想不到嘅舉動。

7歲怕醜女靠卡牌變社交達人 收藏6萬張挑戰世界紀錄

事件主角係20歲嘅瑞士少女喬琳娜（Jolina Gisele），佢嘅收藏之路原來由一個溫馨故事開始。據悉，喬琳娜7歲時因為性格怕醜，唔太擅長同同學仔打交道，而寶可夢卡就成為佢打開話題嘅神奇鎖匙，更係佢同爸爸拉近距離嘅共同興趣。由最初父女間嘅小玩意，到日積月累，收藏規模愈嚟愈大，至今已突破6萬張，遠超現時48,339張嘅健力士世界紀錄，認真誇張！

天價神卡坐鎮估值5.2億！全家嚇到急租專業保險庫

事件曝光後，大批網民替事主擔心嘅係保安問題！原來喬琳娜嘅收藏品入面，有兩張被譽為「夢幻神卡」嘅插畫家皮卡丘（Pikachu Illustrator），單單一張就曾經喺拍賣會上以約1100萬港元天價成交！隨著卡牌市場近年急速升溫，價值水漲船高，喬琳娜媽媽自爆，以前成個房都係卡，但而家基於防盜安全考慮，全家嚇到唔敢再放屋企，要悄悄將所有卡牌轉移到專業保險庫嚴密保管，以免成為匪徒目標。

阿爸爆喊唯一條件放售！童年卡冊載滿回憶幾多錢都唔賣

面對呢批價值連城嘅收藏，喬琳娜一家正計劃整批出售，希望可以由真正嘅收藏家或博物館接手。不過，喬琳娜爸爸感性表示，無論最終成交價有幾高，有一個「非賣品」係絕對唔會放售。原來，喬琳娜童年時用嘅第一本卡冊，對佢哋一家人嚟講，承載住嘅唔單止係卡牌，更加係父女之間無可取替嘅成長回憶。佢哋強調，呢份情感係金錢無法衡量，就算出到天價都絕對唔會賣！