貓主呻兩貓同款同量虎斑貓卻愈養愈肥！翻查CCTV驚見心寒一幕

養寵物最怕就係佢哋病，所以對主子嘅飲食起居真係要睇得好足！最近美國紐約一位女主人就非常頭痕，明明屋企兩隻貓食同一款貓糧，份量都一樣，但其中一隻虎斑貓嘅身形竟然愈嚟愈圓潤，令佢百思不得其解。為咗解開謎團，佢決定裝Cam睇實，點知一睇之下，真相竟然令人哭笑不得！

CCTV揭驚人真相！虎斑貓光速清盤再伸「賊仔手」偷食

從女主人艾蜜莉（Emilie）分享嘅影片所見，當自動餵食器一出糧，虎斑貓Miso同黑貓Meelo就好乖咁各自喺自己嘅碗前面開餐。但問題就嚟喇，Miso三扒兩撥食完自己份糧之後，竟然唔係靜靜等開飯，而係開始伸出佢隻「賊仔手」，係咁將隔離Meelo碗入面嘅貓糧撥過自己面前，一邊默默幫自己「加餐」，一邊大快朵頤，成個過程極之純熟，畫面相當滑稽！

「偷食罪證」全曝光！網民笑爆：偷返嚟嘅卡路里唔計數

Miso嘅「偷食罪證」曝光之後，即刻引嚟大批網民洗版，個個都俾佢熟練嘅搶糧動作笑爆！唔少貓奴留言話勁有共鳴，「我家貓咪也是，所以我都單獨餵食」、「Meelo一度想要阻擋，最後還是放棄了，個樣好無奈」。更有網民搞笑咁幫Miso辯護，話「從其他貓碗裡偷來的卡路里，不會計算到總卡路里中，這是科學」、「識食一定係食碗邊飯」！