路邊執到隻貓仔，好多人都會選擇送去愛協或者收容所，但有位好心男原本都係咁諗，點知一個舉動之後，竟然令佢180度大轉變，更在短短5分鐘內就做下一個重大決定！事緣佢喺路邊發現一隻超虛弱嘅小白貓，本來已經聯絡好動物收容所準備送走，但就係影咗張相，成件事就完全唔同晒！

好心男路邊驚見虛弱小白貓原打算送往收容所

事主近日喺網上論壇Reddit發文，憶述自己駕車經過一間學校附近時，眼角掃到路邊有團「白色小東西」橫過馬路，險象環生。佢即刻停車上前查看，先發現原來係一隻不斷喵喵叫嘅虛弱小白貓。事主擔心小貓安危，馬上聯絡動物收容所求助。收容所職員要求佢先為小貓影相，並提供發現地點、外貌特徵等資料，方便跟進，而事主當時嘅諗法，都只係想暫時照顧下隻貓仔。

影相一刻竟被萌樣擊中心臟5分鐘火速決定收編

點知就係呢個影相嘅動作，徹底改變咗小貓嘅命運！當事主拎起手機按下快門一刻，佢嘅心瞬間被眼前嘅畫面融化。相中嘅小白貓頭頂竟然有一小撮獨特嘅灰色毛髮，望落就好似天空中一朵軟綿綿嘅小雲，個樣楚楚可憐又極度可愛。事主坦言，就係因為呢個「小雲」造型實在太過惹人憐愛，令佢喺短短5分鐘之內就推翻咗原本嘅計劃，火速決定：「唔送啦！我要自己養！」

榮升貓奴帶主子睇獸醫僅得5周大網民大讚有愛

呢段暖心嘅經歷曝光後，大批網民即刻湧入留言區洗版，紛紛送上祝福：「多謝你救咗佢，Cirrus太可愛啦！」事主最終將小貓命名為「卷雲」（Cirrus），正式收編成為家中一分子。佢唔單止帶咗「主子」去睇獸醫，仲即刻買齊貓床、貓砂等必需品。獸醫檢查後推斷Cirrus可能只有5周大，因為年紀太細仲未可以打疫苗。事主表示會等佢大個啲、養肥啲再帶佢覆診，唔少網民都大讚佢係個有愛心嘅好主人！