奶貓慘被惡犬欺凌戰敗！主人直擊「心酸加操一幕」網民笑爆：準備復仇

屋企有養寵物嘅朋友，一定明白毛孩之間嘅互動有時真係好氣又好笑！最近有位主人就分享咗屋企「主子」上演嘅一場恩怨情仇，事緣屋企隻狗狗經常手多多，撩是鬥非，目標直指楚楚可憐嘅小奶貓，結果引發一場世紀大戰，而戰敗後嘅發展更令主人同全網嚇一跳！

惡犬瘋狂挑釁咬頸巾奶貓忍無可忍終極大反擊

事主分享嘅影片所見，屋企隻狗狗似乎視撩貓為每日任務，不停對住小奶貓瘋狂挑釁，甚至過份到直接咬住貓貓條頸巾嬉鬧，誓要激嬲對方先心息。起初，小奶貓仲保持住「主子」嘅風度，選擇忍耐無視，點知狗狗得寸進尺。忍無可忍嘅奶貓終於大爆發，坐直身體，揮舞前爪就向狗狗出招，兩隻毛孩即場上演一場激烈嘅「貓狗對決」，戰況緊張！

主人驚見敗走後心酸一幕奶貓竟獨自默默加操練波

可惜，第一回合嘅對決似乎由狗狗佔上風，身型細小嘅奶貓慘被擊敗，睇得出佢個樣相當唔甘心。正當主人以為事件告一段落，點知更令人意想不到嘅一幕發生咗！主人竟然捕捉到貓貓戰敗後，竟然開始「自主訓練」，自己一隻貓推住個波認真練習，好似默默咁提升緊實力，準備下次再戰。主人見到呢一幕都相當驚訝，忍唔住直呼呢隻奶貓嘅自尊心實在太強，真係令人又心痛又好笑！