養寵物最怕就係主子走失，從此失散！美國有貓主喺7年前搬屋途中，愛貓竟然離奇「人間蒸發」，多年來音訊全無，本已心碎絕望。點知事隔超過2,500個日子，一通電話竟然帶來驚人消息，揭開一個長達7年嘅秘密，最終結局更係感動全城！

搬屋悲劇愛貓人間蒸發苦尋7年終絕望

事件要由2018年12月講起，當時美國嘅戴維森（Davidson）一家正準備由加州搬往佛州，並委託朋友協助運送佢哋喺2016年領養嘅愛貓道奇（Dodger）。點知就喺運送途中，道奇竟然意外失蹤，自此下落不明。主人一家心急如焚，但苦尋多年都搵唔返，隨住時間流逝，佢哋都以為此生無緣再見，心情跌至谷底。

網民洗版激讚奇蹟全靠一粒晶片尋回

事件曝光後，大批網民替事主不值，亦為貓貓嘅遭遇感到心痛！正當所有人都以為故事會以悲劇告終，事隔足足7年後，加州一個動物保護組織喺處理流浪貓個案時，竟然發現其中一隻貓身上植有晶片！工作人員一掃描，驚訝地發現呢隻貓就係當年失蹤嘅道奇！全靠呢粒米咁細嘅晶片，組織成功聯絡到已經搬到喬治亞州嘅原主人。呢個跨越7年嘅重逢故事即時引爆網絡，網民紛紛洗版大讚係「年度最感動奇蹟」，同時再次提醒所有寵物主人為寵物植入晶片嘅重要性，話呢個係「主子返屋企嘅唯一線索」。

義工主人合力跨州接力驅車7小時終團聚

得知愛貓仍然在生，戴維森一家激動不已，即刻安排接返主子。由於佢哋已經由佛州搬到喬治亞州，一位名叫謝爾曼（Sydney Sherman）嘅動保義工就暖心接力，自願帶住道奇搭飛機由加州去佛州。而主人一家亦都唔話得，為咗見返愛貓，專登由喬治亞州驅車足足7個鐘去佛州機場迎接。當見到失散7年嘅道奇時，主人一家終於可以同愛貓溫馨團聚，場面非常感人！