養寵物有時真係好氣又好笑，尤其當佢哋好似人咁古靈精怪！最近網上就瘋傳一單「寵物界懸案」，屋企零食被偷食一空，主人即場開審，點知竟然引發一場「篤灰」風波，成件事嘅發展令超過50萬人睇到目瞪口呆，大呻劇情比宮鬥劇更心機！

主人開審零食失竊案醒目邊牧秒速篤灰出賣隊友

事緣有位主人發現枱上嘅凍乾零食竟然不翼而飛，於是即刻變身判官，嚴肅盤問家中嘅邊境牧羊犬：「枱上凍乾誰吃的？」出名高智商嘅邊牧一聽，即刻心知不妙，神情緊張咁坐低，眼神更係不停咁向右後方狂飄。主人見狀，故意扮傻追問：「你不要怕，告訴我是誰就好」。見主人無反應，邊牧決定唔再忍，直接行到熟睡緊嘅柯基隊友身邊，先用前腳拍一拍對方個頭同背脊「溫馨提示」。點知主人仲係無動靜，邊牧索性使出終極殺著，成隻企起身，用後腳大大力踩落柯基個屁股度，用行動話俾主人知：「兇手就係佢！」

影片吸50萬人圍觀網民群起力撐無辜柯基鬧爆邊牧

呢一幕「踩屁股指證」嘅影片曝光後，即刻喺社交平台被瘋狂洗版，吸引超過50萬人圍觀食花生！大批網民替無辜嘅柯基不值，紛紛留言鬧爆邊牧心機重：「呢個告發手法都太熟練掛！」、「邊牧超心機，唔想認就嫁禍俾同伴」、「柯基真係躺著也中槍」、「完全係職場篤背脊嘅寫照」。成個留言區瞬間變成柯基嘅後援會，齊齊聲討呢隻「金手指」邊牧！

柯基瞓醒一臉茫然慘食死貓網民突破盲點：佢腿短點上枱

成件事最無辜嘅，莫過於瞓到一半突然「天塌下來」嘅柯基。佢被邊牧一腳踩醒之後，完全唔知發生咩事，一臉茫然咁就要接受主人嘅審問，真係名副其實「慘食死貓」。不過，好多精明嘅網民都突破盲點，點出成件事嘅最大疑點：「柯基犬腿短成咁，根本無可能上到枱偷食，邊牧肯定係栽贓嫁禍！」呢個神推論令唔少人恍然大悟，更加覺得柯基係含冤受屈，而邊牧先係真正嘅「零食大盜」！