俗語有話「好心有好報」，但如果回報方式係每日被神秘「組織」跟蹤兼送禮，你又會唔會驚？加拿大一名女子早前一個暖心舉動，竟換來整個「黑衣家族」日日報恩，每日出門都收到各式各樣嘅神秘禮物，事件曝光後令唔少人感到驚奇又羨慕，究竟佢做咗啲咩事？

加國女發現黑影受困排水溝 急call消防員高空拯救

事源於加拿大卑詩省，女事主莉亞（Leah Wilson）早前在住所附近，發現一隻小烏鴉被困喺屋頂嘅排水溝內，情況危急。莉亞見狀，即刻向附近嘅消防員求助。消防員二話不說，馬上搬來梯子進行高空拯救，最終成功將小烏鴉救出。莉亞隨後親自將虛弱嘅小烏鴉送往野生動物救援中心，佢憶述喺過程中，小烏鴉曾輕輕咬住佢隻手指唔放，彷彿知道眼前人係救命恩人，呢個微小嘅互動令佢印象極之深刻。

以為緣份已盡 驚見神秘黑鳥空投羽毛報恩禮物

小烏鴉在救援中心接受治療並康復後，好快就被放歸大自然。莉亞本以為呢段短暫嘅緣份就此結束，點知好戲在後頭！某日佢外出遛狗時，突然有一隻烏鴉飛到佢面前，並丟下一團非常漂亮嘅羽毛。自此之後，莉亞就經常收到呢啲「空投禮物」，陸續有烏鴉飛到佢身邊，放下各種神秘小物件，行動好似明確表達緊「多謝你」，令佢又驚又喜。

真相大白憑腳上金屬環認出真身 烏鴉家族日日打招呼超有愛

呢份神秘嘅報恩行動持續不斷，莉亞終於發現真相！佢認出其中一隻經常嚟「送禮」嘅烏鴉，正係當日獲救嘅小烏鴉，因為佢腳上仍然繫住由救援機構留下嘅小金屬環。原來小烏鴉獲救後並無忘記恩情，更「吹雞」叫埋成班親朋好友一齊報恩！如今莉亞每次外出，身邊總會有幾隻烏鴉飛近，好似專登嚟同佢打招呼一樣，呢份跨越物種嘅真摯情誼，令佢感到無比幸福。