主人返屋企見心愛Crocs變殘骸！兇手當場斷正竟出1招扮無辜 網民：影帝級演技

人贓並獲證據確鑿 狗狗竟全程閉眼扮瞓覺

事主「@seb_aubrey」日前返到屋企，驚見平時最常穿嘅Crocs洞洞鞋被咬到體無完膚，而家中嘅拉布拉多犬傑基（Jackie）就坐喺一旁，眼神閃縮，一副做錯事嘅心虛模樣。事主見狀即場「升堂」盤問愛犬：「傑基，我知道你醒著，係咪你做㗎？」點知傑基面對主人嘅拷問，竟然使出「裝睡」呢招，全程緊閉雙眼，扮咩都聽唔到。最搞笑嘅係，佢忍唔住偷偷開眼𥄫一𥄫情況，一發現主人仲望住自己，就即刻秒速合埋眼，心虛反應令人啼笑皆非！

影片瘋傳網民群起倒戈 力撐狗狗：我個客睇唔到

事件曝光後，大批網民不但冇替事主不值，反而紛紛倒戈，為狗狗傑基嘅神級演技護航！影片喺網上瘋傳，唔少網民化身「辯護律師」留言力撐：「請注意，我嘅委託人甚至睇唔到你指控佢啲咩」、「狗狗表示：你睇我唔到，你睇我唔到」、「我咩都聽唔到，因為我合埋咗對眼」，一面倒嘅搞笑留言令討論區徹底洗版。

飼主踢爆並非初犯 曾用同一招數逃避責任

正當大家以為傑基只係一時諗到絕世好橋，事主就無奈踢爆，原來愛犬已經係慣犯！佢透露傑基過往都試過喺後院挖出一個大洞，被主人發現質問時，同樣使出呢招「閉眼裝傻」企圖蒙混過關。傑基屢次犯案後嘅心虛反應，令主人既無奈又覺得好笑，亦難怪一眾網民都大讚佢實在太可愛！