買寵物返屋企本應係開心事，點知隨時有驚嚇！最近國外有位事主滿心歡喜買咗2隻天竺鼠，寵物店職員仲拍心口保證係全公，點知隔咗一晚，鼠籠竟然離奇多咗5個新成員，由2隻變7隻，事主當場嚇到傻眼，直呼「這到底是甚麼鬼？」，場面極度錯愕！
店員信誓旦旦保證係公鼠 翌日驚見5隻鼠B破功
事主大呻，日前喺寵物店睇中兩隻可愛嘅天竺鼠，分別改名做「史派克」同「謝爾頓」。當時店員再三保證兩隻都係公鼠，事主先放心將佢哋放入同一個籠飼養。點知呢個「保證」第二日就光速破功！當事主準備餵紅蘿蔔時，赫然發現籠內除咗兩隻成年天竺鼠，草堆中竟然鑽出5隻手掌咁大嘅鼠B，成個籠熱鬧到不得了，原本嘅2人世界，一夜之間戲劇性變成「一家7口」，令佢完全措手不及。
影片曝光網民瘋狂洗版 揶揄買2送5超值套餐
事件曝光後，事主將呢個哭笑不得嘅經歷分享上網，影片隨即引嚟大批網民洗版式留言！唔少網民都替事主感到無奈，同時又忍唔住瘋狂揶揄：「買2送5，呢個優惠套餐邊度搵？」、「店員可能計錯數」、「應該要待在裡面直到房東離開才對」，留言區充滿歡樂氣氛，大家都對呢個意外驚喜議論紛紛。
事主無奈接受現實升呢 榮升7鼠之母硬食苦果
面對呢個突如其來嘅「大家庭」，事主坦言感到無奈又崩潰。不過，睇住5隻健康活潑嘅鼠B，佢最終都只能認命接受現實。由原本兩隻鼠寶嘅主人，一夜間「升呢」做「7口之家」嘅一家之主，硬食店員出錯嘅苦果，睇嚟未來嘅日子要為多養5隻鼠B而努力喇！
