帶心愛嘅寵物外出放電，係唔少主人嘅假日指定動作，但如果帶埋佢哋去動物園，分分鐘會發生意想不到嘅驚險場面！日前外國有狗主帶同愛犬遊覽動物園，點知經過雪豹園區時，玻璃另一邊嘅雪豹竟將狗狗誤認成「獵物」，隨即高速衝前兼瘋狂拍打玻璃，企圖上演一場「捕食騷」！正當大家以為狗狗會嚇到魂飛魄散之際，佢嘅反應卻令全場人O晒嘴！

雪豹誤認獵物高速猛撲玻璃狗狗竟淡定回望

事發當日，女飼主潔西卡（Jesenna）帶住愛犬莉卡（Liika）到動物園遊玩。當佢哋行經雪豹園區時，原本背對住玻璃嘅莉卡，完全無為意自己已經成為猛獸嘅目標。突然之間，園區內一隻雪豹高速衝向玻璃，更伸出前爪不停猛力拍打，似乎想將莉卡當成「下午茶」。可惜隔住塊厚玻璃，雪豹始終無法得逞，只能焦急地來回踱步。而主角莉卡聽到巨響後，只係施施然轉身，面對住近在咫尺嘅「大貓」，非但無被嚇親，反而極度淡定咁望實對方，甚至低吼幾聲以示回應，場面非常逗趣。

影片曝光引發群組洗版網民大讚狗狗勇氣可嘉

事件影片被事主分享至社交平台後，隨即引發網民洗版式討論，大批網民都被狗狗莉卡嘅神級反應萌倒，紛紛留言大讚：「狗狗超淡定」、「狗狗：唔好意思，你需要幫手嗎？」、「狗狗好勇敢」。事主潔西卡都大感意外，笑言愛犬莉卡平時「基本上咩都驚」，但今次面對雪豹嘅熱情招待，似乎完全無被列入佢嘅「驚嚇名單」之中，反差極大！

溫馨提示惹議帶寵物遊園或對動物造成困擾

正當大部分網民都讚緊狗狗夠淡定，亦有另一批網民提出唔同意見，提醒各位寵物主人。有網民指出，其實帶寵物去動物園時，應該避免將佢哋帶到玻璃窗邊，因為咁樣做有機會為圍欄內嘅動物帶嚟不必要嘅壓力同困擾。雖然今次事件有驚無險，但都提醒大家，遊覽動物園時都要顧及園內動物嘅感受，避免類似情況再次發生。