一個人練跑最怕遇到咩？唔係體力不繼，而係突然有「不速之客」跟住你！日前美國夏威夷就有一名女子為馬拉松練跑時，被一隻神秘黑影緊隨其後，當下嚇得佢心驚膽顫，以為會被攻擊。點知翌日佢竟然念念不忘，更專程折返原地，結果迎來一個超暖心嘅結局，令無數網民大為感動！

事主憶述驚心動魄一刻狗狗陪跑1段路後竟消失

事主艾美（Amy Kanakuri）憶述，當日佢喺懷厄奈（Waianae）獨自練跑，突然有隻流浪狗狗向佢直衝而來，令佢當堂嚇親，擔心會被攻擊。但佢好快就發現狗狗並無惡意，只係想搵個伴一齊跑。呢隻充滿靈性嘅狗狗陪跑咗一段路之後，就自行離開消失於路邊。艾美返到屋企後，腦海中一直浮現狗狗嘅身影，對佢念念不忘，心中始終掛住呢位只有一面之緣嘅「跑步夥伴」。

事件曝光後網民留言洗版大讚狗狗懂得自己揀主人

呢個溫馨故事曝光後，大批網民立即湧入留言區洗版，紛紛替事主同狗狗感到高興！唔少網民都大讚狗狗「好有靈性，自己揀咗你做主人」、「呢個係你人生中最棒嘅決定！」亦有網民搞笑代入狗狗角色話：「佢個樣好似講緊『我都好鍾意跑步，一齊跑啦！』」更有大量留言祝福佢哋：「恭喜你獲得了最佳跑步夥伴」、「多謝你收容可憐嘅寶寶，俾咗個家佢！」

結局神反轉翌日折返原地尋回浪浪正式收編成家人

正當大家以為呢段奇遇只係一個短暫嘅插曲，結局竟然迎來神反轉！艾美第二日決定揸車返去相遇嘅地方碰碰運氣，竟然真係再次搵返嗰隻狗狗！狗狗見到艾美亦表現得非常親近，甚至主動跳上車。艾美隨即帶佢去獸醫診所檢查，確認佢身上無晶片、並非走失寵物後，就決定正式收編呢位家庭新成員，並為佢改名為「瑪希娜」（Mahina）。從此，瑪希娜唔單止係艾美嘅練跑神隊友，更成為佢生命中不可或缺嘅家人。