駐韓美軍許下承諾！苦等4年為「戰友」跨越半個地球催淚結局曝光

軍人與軍犬之間嘅情誼，往往比想像中更深厚！美國一名空軍士兵4年前派駐南韓時，與一隻軍犬結下不解之緣，雖然並非正式拍檔，但感情卻情同手足。士兵回國後依然心心念念，許下承諾要接「戰友」回家。事隔4年，呢個跨越半個地球嘅約定終於實現，重逢一刻嘅畫面極度催淚，感動大批網民！

駐韓邂逅軍犬非拍檔卻情同手足

事件主角是美國空軍預備役士兵艾力克斯・瓊斯（Alex Jones），佢喺2020年被派駐南韓服役期間，遇上咗軍犬麥克斯（Max）。雖然喺編制上佢哋並非執行任務嘅拍檔，但無阻一人一狗私下建立起深厚感情。瓊斯憶述：「有些好狗是你一輩子都不會忘記的，麥克斯就是其中之一。」喺異鄉服役嘅日子，麥克斯嘅陪伴為瓊斯帶嚟無比勇氣。即使後來任期結束返回美國，瓊斯依然對呢位「戰友」念念不忘，並喺心中默默許下承諾，只要麥克斯一退役，就必定會領養佢，畀佢一個永遠嘅家。

苦等4年終退役跨越半個地球重逢

經過長達4年嘅漫長等待，麥克斯終於從軍隊榮譽退役。喺非牟利組織「戰爭之爪」（Paws of War）嘅大力協助下，一場跨國重逢計劃正式展開！麥克斯由南韓出發，跨越半個地球，終於飛抵美國北卡羅萊納州，與瓊斯上演一場遲來的重逢。為咗表揚麥克斯多年來嘅付出，組織更特別向佢頒發「有心英雄獎」。當瓊斯再次摸到麥克斯熟悉嘅大頭，睇住佢興奮搖尾嘅一刻，當年「帶你回家」嘅承諾，終於成真。