養寵物最窩心嘅時刻，莫過於見到毛孩之間流露出最純粹嘅感情。最近網上就瘋傳一段超有愛嘅影片，德國一位狗主分享家中博美犬嘅暖心日常，其中一隻狗狗因為天生聽唔到嘢，每次都錯過迎接主人嘅機會，好彩佢有一位「天使兄弟」出手相助，溫馨互動融化全球萬千網民，睇到個個都眼濕濕！

同伴天生失聰聽唔到門鐘聲 暖男博美犬一個舉動超有愛

事源係德國女飼主「@missyminzi」分享嘅一段影片，佢指出每日當伴侶返屋企時，屋企幾隻狗狗都會超興奮咁衝去門口迎接。不過，其中一隻叫利奧（Lio）嘅博美犬因為天生失聰，完全聽唔到任何動靜，所以次次都仲喺度熟睡，無法第一時間參與呢個「歡迎儀式」。正當大家以為利奧會錯過呢個溫馨時刻，佢嘅好兄弟馬蒂（Matti）竟然發現咗！影片所見，馬蒂跑到一半突然停低，折返回到利奧身邊，用個鼻溫柔咁將佢叫醒，然後再陪住佢一齊跑向主人，確保兄弟唔會被冷落，畫面真係超級有愛！

影片瘋傳感動全球萬千網民 激讚毛孩比人類更有同理心

呢段充滿愛嘅影片曝光後，旋即喺Instagram瘋傳洗版，唔少網民都俾呢對狗兄弟嘅深厚情誼打動。大批網民湧入留言，大讚馬蒂係「天使狗狗」、「最佳好兄弟」，更有人感動表示「睇到眼都濕埋」、「動物之間嘅溫柔有時比人更純粹」，認為毛孩之間嘅同理心同無私嘅愛，有時甚至比人類更真摯，完全融化咗大家嘅心。

主人揭暖心舉動並非偶然 更身兼另一病犬嘅守護天使

正當網民以為呢個只係單一事件，飼主就再投下「催淚彈」，佢透露馬蒂呢個暖心舉動並唔係偶然，而係長期養成嘅習慣！無論幾時，只要馬蒂發現利奧「落單」，都會主動飛奔到佢身邊提醒。更令人感動嘅係，馬蒂唔單止照顧失聰嘅利奧，仲會一直陪伴家中另一隻患有小腦發育不全症嘅狗狗墨菲（Murphy），儼然成為家中嘅「愛心大使」。飼主直言，能夠收養到馬蒂係全家最珍貴嘅禮物，因為佢從不讓任何一個同伴被遺忘，呢份愛心真係無價！