養足3年寵物公雞慘被打斷腳！女飼主心痛帶去求醫結局令網民O嘴

養雞唔係為咗食，唔通真係為咗愛？近日山東就有名女子，竟然帶住隻腳打石膏嘅公雞去睇醫生，畫面相當衝擊！原來呢隻公雞已經飼養足足3年，早已被女飼主一家視為心肝寶貝。點知一個意外，竟然搞到要驚動獸醫出手，事件曝光後更引發網民洗版式熱議，究竟發生咗咩事？

飼養3年當正寵物公雞啄人慘遭老豆打斷腳

事主大呻，呢隻公雞已經養咗大約3年，早已唔係普通家禽，而係當正寵物咁錫。事發當日，公雞因為啄人，激到事主爸爸出手教訓，點知一下重手，竟然將公雞隻腳打到骨折！事主媽媽返屋企見到「愛寵」受重傷，心痛不已，於是就決定帶佢去動物醫院求醫，誓要救返佢！

相關影片喺網上瘋傳後，大批網民都睇到O晒嘴，留言極速洗版！唔少人對「雞都打石膏」感到嘖嘖稱奇，紛紛留言調侃：「硬核養寵，呢個年份嘅雞都打上石膏了」、「等隻腳好返，敲敲個石膏又骨折了」。更有抵死網民錯重點，竟然留言話：「燉啲雞湯補補啦！」，令人哭笑不得，直指「網上真係咩新鮮事都有」。

雖然網民反應兩極，但女飼主一於懶理，堅持帶公雞去睇獸醫。經過診斷後，獸醫確認公雞骨折，並即時為佢受傷嘅部位打上石膏固定。女飼主強調，佢哋一家從來無諗過要食咗呢隻雞，「雞養了有3年，也不是想吃牠」，早已視為家庭一份子，今次扑心扑命都要醫返好佢，足見人同動物之間嘅感情，有時真係超乎想像！