好心做壞事！孝順女幫手開檔一個動作令阿媽慘蝕$1000兼75KG心血...

正所謂「唔怕神一樣嘅對手，最怕豬一樣嘅隊友」，但如果「豬隊友」係自己個寶貝女，仲要係出於一片好心，你又會點處理？日前廣東廣州一間滷味檔就上演咗一幕「人間慘劇」，事主李女士準備開檔之際，孝順囡囡想幫手，點知一個錯誤動作，就令餐車上重達75KG、價值近千元嘅滷味全部倒瀉，心血瞬間化為烏有，真係睇見都肉赤！

孝順女幫手慘變倒米 75KG滷味一秒倒瀉損失慘重

事發喺廣州嘅「李妹妹滷味」檔口，當時檔主李女士正準備開檔，將數十盤滷味放上電動餐車。佢個女見狀，好心想上前幫忙，於是爬上餐車想插車匙。點知一個唔小心，竟然扭錯油門，令成架餐車失控向後翻側！車上總重約75KG嘅滷味瞬間全部倒晒落地，場面一片狼藉，根本無法再出售。幸好當時有位成年男子眼明手快，即刻抱走附近另一位小妹妹，先至冇釀成更嚴重嘅意外，但近千元嘅貨就咁報銷，真係欲哭無淚。

媽媽零責罵高EQ神應對網民洗版式激讚係育兒典範

事件曝光後，大批網民都替事主慘痛嘅損失感到不值，但更令人關注嘅係媽媽嘅後續處理。面對嚇到就快喊出嚟嘅囡囡，李女士竟然冇半句責罵。佢事後表示，明白個女只係想幫手，所以選擇先安慰個女，再默默清理現場，並急call家人幫手，火速用咗2個鐘重新趕製滷味再出攤。呢種高EQ嘅神應對，引嚟網民洗版式激讚，紛紛留言大讚「呢位媽媽情緒太穩定」、「簡直係育兒典範」，認為佢嘅冷靜同體諒，比任何說教都更有教育意義。