Fresh grad見工，最怕遇到咩情況？見工表現失準？定係HR問埋啲奇怪問題？台灣有位畢業生就慘遇人生最尷尬場面，滿心歡喜以為心儀Offer即將到手，點知自己阿媽竟然喺面試中途殺入公司大吵大鬧，搞到場面極度難堪，一份大好前途嘅工作隨時凍過水，事主更喺網上崩潰大呻：「我媽毀了我的工作」！

台女見工阿媽突襲公司大廳當眾開火

事主大呻，自己阿媽長期以來都有極強控制慾，不但禁止佢學車，甚至連佢想去日本留學都出手阻攔，驚死佢會延遲畢業。到咗見工當日，阿媽更堅持要親自揸車送佢去公司。點知面試期間，阿媽因為聯絡唔到個女，竟然就直接闖入公司搵人，最後更喺公司大廳同事主當眾爆發爭執，令事主感到極度羞愧，情緒當場崩潰。

網民群起公審恐怖媽媽直斥係現實鬼故

事件曝光後，即刻引發群組洗版，大批網民替事主不值，鬧爆阿媽行為太恐怖！唔少人留言話：「呢啲根本係現實版鬼故，大好前途就咁俾阿媽毀咗」、「有啲父母真係見不得自己仔女好」。更有網民分享自身經歷，表示對呢種過度干涉嘅父母深有共鳴，大呻：「我媽都係呢種類型，無公主命，但有公主病！」

份工凍過水事主超崩潰網民力勸快啲搬走

經歷呢場災難級面試後，事主份工好可能就此泡湯，令佢極度難堪。網民紛紛獻計，一面倒力勸事主盡快搬離屋企，減少同阿媽嘅接觸，避免悲劇再次發生，鼓勵佢：「唔好俾任何人毀咗你嘅人生！」亦有分析指出，呢種母女關係嘅隔閡，源於母親內心嘅創傷，令佢哋難以體會女兒嘅感受，造成「點解媽媽只能愛我咁多？」嘅悲劇。