商場搞「偷食」大賽獎1克黃金！逾2000人瘋搶報名冠軍竟是...

返學上堂最刺激嘅事，莫過於喺老師眼皮底偷食零食！最近內地一個商場就將呢個集體回憶變成一個別開生面嘅「偷食大賽」，比賽竟然吸引超過2000人瘋狂報名，由幼稚園細路到70歲嘅老友記都一齊玩，而冠軍獎品更係價值超過$1600嘅一克黃金，引發全城熱話！

還原上堂偷食回憶被捉要罰站30秒

呢場比賽嘅玩法非常過癮，商場直接將現場佈置成課室，參賽者全部化身「學生」，要喺巡邏嘅「老師」面前偷食指定食物。根據比賽規則，一旦被「老師」捉到就要即刻罰站30秒！喺初賽階段，參賽者要喺10分鐘內食完所有嘢，而且被捉次數唔可以超過3次，先可以成功晉級，氣氛緊張又搞笑！活動負責人表示，比賽靈感源於大家對學生時代嘅懷念，希望用輕鬆方式畀大家重溫校園時光，而且活動完全免費，難怪由中午到夜晚都人頭湧湧！

小學生零失誤被封職業選手網民洗版

活動影片在網上瘋傳後，隨即引發網民洗版式討論，其中一班「參賽者」嘅表現更係技驚四座！唔少網民都笑稱，場內嘅小學生參賽者根本就係「職業選手」，因為佢哋完全掌握「偷食」技巧，竟然冇任何一個被老師捉到要罰站，完美示範咩叫「實戰經驗」！有網民留言話「小學生根本係實戰派」、「呢個唔係偷食大賽，係青春回憶大賽」，大讚活動有創意又有共鳴。