5旬男女高空一見鍾情！商務艙忘我激戰驚動機師 落地秒被捕揭驚人身份

5旬男女商務艙上演活春宮 兒童乘客目擊嚇到即刻告發

事件發生喺一班由巴拿馬飛往阿根廷嘅巴拿馬航空CM836航班上。涉事嘅54歲男子同59歲女子都係阿根廷人，本身互不相識，但喺機上疑似「一見鍾情」，天雷勾動地火，竟然無視當時機艙內仲有多名乘客，直接喺商務艙座位上做出火辣嘅不雅行為。誇張行徑被一名兒童乘客全程目擊，小朋友嚇到即刻向乘務員告發。機組人員得悉後大為震驚，隨即通報機師，機師為咗控制場面，喺降落前已經通知阿根廷機場警方喺地面候命。

落地秒被捕衣衫不整超狼狽 男方已婚身份大曝光

客機一降落喺阿根廷羅薩里奧國際機場，機場警方即刻衝上機，將呢對仲未知大禍臨頭嘅男女帶走。根據警方紀錄，兩人被捕時衣著凌亂，狀態非常狼狽。而最令人震驚嘅係兩人嘅背景，初步調查顯示，59歲女事主係一名已離婚嘅企業家，而54歲男主角竟然係一名已婚建築師，仲有3個仔女！為咗一時激情，隨時家庭破裂，真係唔知點同老婆仔女交代。

面臨公然猥褻罪檢控 專家指或被航空公司列入黑名單

目前，呢對男女因為涉嫌喺公共場所做出不雅行為，已經被控公然猥褻罪。有法律及航空安全專家指出，乘客喺機艙內嘅猥褻或擾亂秩序行為，唔單止會面臨刑事責任，更可能違反航空規定。航空公司有權將佢哋列入黑名單，以後都唔可以再搭該公司嘅航班，真係一次偷食換嚟雙重打擊，得不償失。