內地超市盜竊案無日無之，但手法如此「出神入化」實屬罕見！近日吉林一間超市驚現離奇盜竊案，一名打扮時髦、化上濃妝的「大媽」被店員發現有「零元購」嫌疑，當場斷正報警。警方到場後，竟在「大媽」身上搜出多件贓物，但最令人心寒的，是揭發其口罩下的驚人真面目，身份真相叫人咋舌！
店員憑CCTV鎖定目標人物 濃妝大媽外套內暗藏乾坤
事發當日，超市店員透過閉路電視，發現一名戴黑色口罩、短髮濃妝的「大媽」行徑鬼祟。只見佢喺貨架之間徘徊，將零食等貨品拎上手後，商品竟「憑空消失」，懷疑已被暗中藏起。當呢位「大媽」以為神不知鬼不覺，準備施施然離開時，即被醒目店員截停並報警處理。警方到場後，「大媽」一度否認指控，但警員最終喺佢件黑色大褸入面，搵出多件未畀錢嘅商品，斷正無得抵賴！
事件曝光後網民群起洗版 錯重點恥笑犯案裝備超齊全
事件曝光後，大批網民替店員捏一把汗之餘，更多人竟然錯重點，對疑犯嘅「專業」扮相嘖嘖稱奇，引發群組洗版式恥笑！有網民鬧爆：「圖們都出咁嘅人才！」、「呢個阿伯必火！」、「偷嘢都要成本，假髮、化妝品、女裝衫褲鞋…」。更有人突破盲點，驚嘆疑犯「配件挺全，nainai都有」，恥笑佢為咗犯案，裝備實在太過齊全，簡直係「易容界KOL」！
警方盤問揭驚人真相 大媽真身竟是7旬老翁為$70犯案
最令人震驚嘅情節仲喺後頭！警方深入盤問及核實身份後，驚訝地發現呢位濃妝豔抹嘅「大媽」，真身竟然係一位年約70歲嘅老翁！贓物總值僅約60多元人民幣（約70港元），阿伯為咗區區$70蚊，竟然大費周章男扮女裝犯案。佢供稱只係行過零食貨架時一時起貪念，先用女裝偽裝身份落手。目前，該名老翁已因涉嫌盜竊被依法行政拘留，成件事真係令人哭笑不得。
