去動物園見到可愛嘅小動物，唔少人都會母愛大發，忍唔住想餵食。不過亂咁餵嘢食，分分鐘會害死動物！最近內地天津一個動物園為咗勸退遊客，就諗到條絕世好橋，用一段「神級廣播」成功令遊客自動收手，內容更令大批網民聽完心碎，高呼：「殺人誅心啊！」

廣播員天津話狂串遊客食得仲差過動物

事件喺天津市動物園發生，園方為咗阻止遊客亂投餵，竟然唔係用嚴肅警告，而係錄咗段天津方言嘅幽默廣播！廣播員用超串語氣話，園內嘅動物全部都係「在編職工」，唔單止有糧出有保險，仲會定期體檢。最誇張嘅係佢哋嘅伙食，廣播提到動物們可以「一筐筐地吃貓山王榴槤」、「一條條地挑選三文魚」，甚至「你一片片吃西瓜，動物一車車啃」，最後更抵死地奉勸遊客：「有閒錢還是對自己好點吧！」擺明寸緊遊客食得仲差過啲動物！

網民聽完心碎高呼手裏外賣飯盒都唔香

呢段「單口相聲式」廣播影片曝光後，即刻喺網上洗版，大批網民都話聽到懷疑人生！唔少人留言鬧爆「太扎心了」、「聽完手裡的拼好飯（外賣）都不香了，動物吃三文魚，我吃預製菜。」、「傷害性不大，侮辱性極強！」成個討論區都係一片哀嚎，紛紛表示被呢段廣播KO，形容園方呢招簡直係「殺人誅心」，效果拔群。

幽默勸退手法獲激讚被封為最強廣播

事件瘋傳後，雖然好多網民都話「心碎」，但其實大家都係講笑，反而激讚園方呢個做法夠晒高章！唔少人認為，比起死板嘅「請勿投餵」標語，呢種幽默又帶點諷刺嘅方式，更能令人印象深刻，真正入腦。有網民就大讚：「天津人連廣播都自帶包袱（笑點）」，認為呢種軟性勸導方式，比強硬禁止有效得多，絕對係年度最強嘅勸退廣播！