讀書不成等於無出色？呢個觀念可能要改寫喇！蘇格蘭一位少年16歲就毅然決定輟學，當人人都以為佢「玩完」之際，佢竟然靠一個方法，短短2年內將年營業額由零谷到上56萬英鎊（約590萬港元），由屈喺睡房仔嘅小賣家，搖身一變成為坐擁近千呎大貨倉嘅老闆，究竟佢係點樣做到？
13歲賣糖仔起家轉戰二手名牌服飾
呢位名叫史考特（Leon Scott）嘅18歲少年，商業頭腦可以話係自細培養！佢早喺13歲已經喺學校賣糖果賺零用錢，之後更發現二手名牌服飾市場嘅巨大潛力。佢開始用零用錢喺Vinted、eBay等平台買入Moschino、Alexander McQueen等二手名牌衫，再加價轉售，而且將所有利潤滾大再入貨。生意越做越大，搞到成間房都係衫褲鞋襪！到16歲時，佢每月營業額已經高達3,000英鎊（約3.2萬港元），眼見課堂知識對事業無幫助，佢就做出一個大膽決定：輟學全力創業！
直播拍賣成事業轉捩點生意額幾何級數飆升
輟學後，史考特嘅事業迎嚟一個關鍵轉捩點！2024年初，有直播拍賣平台睇中佢，邀請佢做直播主。本身有打機直播經驗嘅佢一試便愛上，第一次開Live賣貨，短短1個鐘就賺到65英鎊（約683港元），令佢發現新大陸！自此佢幾乎日日開Live，透過鏡頭同買家即時互動，成交率大大提升。全職投入後，佢嘅生意額直線上升，由第一年總銷售額2.5萬英鎊（約26萬港元），到第二年更瘋狂飆升至56萬英鎊（約590萬港元），認真誇張！
年賺590萬未忘本首筆錢竟係帶阿婆去旅行
生意越做越大，史考特由最初借用阿婆屋企嘅空房擺貨，到一年後已經唔夠用，最終要租下一個3000平方英尺（約915平方米）嘅巨型貨倉！豬籠入水嘅佢亦無忘本，賺到錢後第一件大事，就係帶曾經借位俾佢擺貨嘅阿婆去荷蘭阿姆斯特丹旅行，以報答佢嘅支持。史考特坦言從未後悔16歲輟學嘅決定，更鼓勵年輕人唔好怕行傳統以外嘅路，只要有耐性同堅持，一樣可以闖出一片天！
