師奶厭倦洗衫地獄意外創出$6700萬洗衣王國！收入仲高過揸Uber？

做家務做到懷疑人生，絕對係唔少主婦嘅每日寫照！澳洲一位師奶就因為厭倦日日對住堆積如山嘅衫褲，忽發奇想將「幫人洗衫」變成一盤生意。點知呢個諗法竟然令佢13年內大翻身，一手打造出估值高達$6,700萬港元嘅洗衣王國，認真犀利！

拆解$6700萬洗衣王國商業模式

呢位師奶媽媽名叫蘇珊（Susan Toft），佢創辦嘅洗衣平台「The Laundry Lady」並唔係傳統加盟店，而係採用類似Uber嘅模式運作。旗下約490名承包商（多數都係媽媽）可以自由接單、自訂工作時間，每張單更可以袋走8成收入，平台只抽2成用作營銷同開發。蘇珊透露，客人平均每次消費約$404港元，而承包商每星期收入可達$6,028至$8,040港元，如果全職做，收入隨時超過$11,000港元，蘇珊更直言：「收入比開Uber還多！」

登上節目後一夜爆紅官網被癱瘓

平台一直主攻家庭同小型商戶呢啲「小量市場」，直到2023年，蘇珊登上澳洲版《Shark Tank》節目後，公司知名度瞬間引爆！節目播出後，想加入做承包商嘅申請人數由每星期100人，瘋狂飆升5倍至超過500人，官網更因為流量太大而一度死機癱瘓，場面墟冚！蘇珊堅持唔搞加盟制，就係想降低門檻，令更多想幫補家計嘅女性可以輕鬆加入。