飲宴做人情向來是大學問，俾得多又肉赤，俾得少又怕失禮。最近有位港女就遇上「人情悲劇」，好心去飲一個唔太熟朋友嘅婚宴，單拖到賀俾足$900人情，點知事後竟從朋友口中得知，新娘在背後狂踩佢「孤寒」，令事主大呻簡直係「貼錢買難受」，一肚氣！

事主呻交情普通照俾面出席 單拖赴宴做足功課俾$900

事主在討論區大呻，指早前收到一個「好耐無聯絡」朋友的紅色炸彈，坦言雙方交情唔算深，但本著祝福對方的心意，仍然決定「俾面」單獨赴宴。出發前，事主更細心做足功課，特地查過婚宴酒店的行情，得知每圍大約$5,700至$6,200港元。考慮到交情普通，她決定封$3,600新台幣（約$900港元）做人情，心想單人出席這個數目絕對合理有餘。

新娘背後狂踩做老闆出手孤寒 事主心寒：花錢買難受

誰知一片好心卻換來惡意中傷！事主事後在共同朋友群組中，驚悉新娘竟然在背後抱怨佢人情包太少，更嘲諷佢「明明自己開店做老闆，出手卻咁孤寒」！這番話令事主感到極度錯愕又心寒，無奈反問：「唔通我賺得多，就一定要包多啲？」她直言原本只係出於情面去祝福，結果反被當水魚兼唱衰，感覺極不舒服，大呻自己根本係「花錢買難受」！

網民鬧爆新娘當婚禮係生意 斥$900睇清一個人算抵

事件曝光後，大批網民替事主不值，討論區即時被洗版！網民紛紛鬧爆該名新娘「將婚禮當生意咁做」，「恭喜你用$900睇清一個人，抵返晒啦！」、「咁耐無聯絡，肯到場已經好好，俾$900算係咁啦」、「呢啲朋友可以即刻unfriend」。不少人更力撐事主，認為交情普通兼單人出席，$900人情絕對是公價有凸，批評新娘食相太難睇！