去日本來來去去都是東京、大阪？想睇teamLab又唔想再同人逼豐洲？機會嚟喇！國際知名藝術團隊teamLab又有新搞作，今次竟然殺入千葉縣一個古老森林，將整個山谷變成夜間限定的魔幻仙境！展覽由4月17日起期間限定開放，消息一出已經引爆粉絲期待，想知有幾震撼、點樣買飛最抵？即刻碌落去睇懶人包！

走進百萬年歷史峽谷感受光影生死循環

今次teamLab最新戶外展覽選址千葉縣大多喜町的「養老溪谷」，呢個地方本身已經係以原始森林同溪谷聞名嘅秘境。團隊以「數碼化自然」為主題，將光影藝術同大自然完美結合。其中一個必睇作品「Continuous Life and Death at the Now of Deep Time」，就係將花朵由綻放到凋謝嘅影像，直接投射喺經過百萬年河水沖刷而成嘅峽谷岩壁上，置身其中，彷彿可以感受到時間流動同生命嘅循環，場面極度震撼！

網民熱議必到打卡位光之瀑布森林

展覽一公佈，唔少粉絲已經準備撲飛朝聖，當中最多人討論嘅就係幾個超夢幻打卡位！被譽為「呃Like之最」嘅，絕對係「Universe of Water Particles in the Forest of the Yoro Valley」，走入森林就好似見到無數光之瀑布從天而降，水花像真度極高，仙氣滿瀉！另外，「Forest of Autonomous Resonating Life」區域佈滿巨型發光蛋，只要用手輕輕觸碰，光蛋就會變色兼發出獨特聲響，仲會同周圍嘅光蛋產生連鎖反應，互動感滿分，無論大人定細路都肯定玩到唔捨得走！

期間限定開催詳情即睇門票價格攻略

想去朝聖就要mark實日子喇！呢個「teamLab Yoro Valley」展覽由4月17日展出到5月24日，可以話係快閃限定。官方強烈建議大家預先上網訂飛，因為現場買飛要貴200日圓（約10蚊港紙）！平日成人票價為1,500日圓，週末及假日就係1,800日圓；而中小學生統一收費800日圓，學前兒童更加係免費入場，絕對係親子遊好去處！想避開人潮又想慳錢，就記得要預早上網買定飛喇！