去日本旅行，不少人都會去Starbucks打卡，順便試試當地限定產品。但如果一心想食的早餐Set竟然連續兩日都賣斷市，你會選擇嬲爆走人，定係另有對策？最近有位食客就分享喺東京一間星巴克嘅奇遇，原本以為要失望而回，點知結局竟然係一個超窩心嘅體驗，仲意外解鎖咗一個「隱藏版食法」！

朝聖東京星巴克旗艦店人氣早餐 連續兩日摸門釘8點已沽清

事主分享，佢專程去到位於東京目黑區嘅「Starbucks Reserve Roastery Tokyo」（星巴克臻選®東京烘焙工坊），目標係一嚐被譽為「酒店級數」、盛惠2,250円（約港幣$112）嘅人氣早餐「Roastery Breakfast Mattina」。呢款早餐每日只供應到朝早11點，事主第一日朝早10點半去到，已經被店員告知賣晒。佢死心不息，第二日提早到9點再去挑戰，點知店員竟然話早餐喺朝早8點鐘已經全部沽清！連續兩日食白果，事主大感失望，心諗唔通真係同呢個早餐無緣？

事主絕望下膽粗粗求助 店員神級應對結局大反轉勁窩心

眼見可能要再次失望而回，事主抱住最後一絲希望，膽粗粗問店員有冇其他方法，例如可唔可以將早餐入面嘅麵包同火腿分開買。估唔到店員不但冇嫌佢麻煩，反而超有耐性咁話：「麵包可以單買，火腿我哋三文治都有用，不過……請你等一等。」然後就即刻用對講機同同事溝通。正當事主滿心期待之際，店員返嚟竟然提議一個神秘餐單，仲親自帶佢去到一樓嘅Princi麵包店，介紹一個連事主都唔知嘅「隱藏服務」。

解鎖隱藏版自訂早餐服務 埋單近3000円事主大讚物超所值

原來呢個神秘服務就係「Customize Bread」（自訂麵包）！事主可以自由選擇鍾意嘅麵包、芝士同多款火腿，砌成獨一無二嘅早餐拼盤。喺店員嘅熱心介紹下，事主幾乎點勻晒所有配料，包括Prosciutto（生火腿）、Mortadella（開心果莎樂美腸）等四款高級火腿，砌出嚟嘅成品豐盛到好似高級酒店嘅早餐！雖然最後埋單要2,934円（約港幣$146），比原本嘅早餐仲要貴，但事主就大讚物超所值！佢表示唔單止發掘到Starbucks嘅新食法，更重要係感受到日本店員嗰種無微不至嘅服務態度，將一次失望經歷變成超溫暖嘅回憶，絕對係一個完美嘅結局！