近年「炒風」熾熱，由演唱會飛、限量版波鞋，以至人氣玩具，通通都成為炒家目標，搞到一眾真粉絲有錢都買唔到心頭好，認真激氣！尤其係風靡全球嘅《Pokémon》卡牌，更加係炒賣重災區。不過，道高一尺魔高一丈，最近日本有間舖頭就諗到一條絕世好橋，用一個超簡單嘅物理方法，完美KO炒家黨，令一眾卡迷大呼治癒！

日店出絕招剪爛包裝！1秒摧毀炒家發達夢

事發喺日本埼玉市一間名為「晴れる屋2」（Hareruya 2）嘅Pokémon卡牌專門店。面對無日無之嘅炒賣行為，店方決定唔再忍，直接同炒家「開戰」！佢哋嘅終極武器竟然係一把普通嘅剪刀。店員喺出售最新嘅「Mega Dream EX」補充包時，會先喺包裝嘅左上角「咔嚓」一聲剪走一角！呢個舉動背後嘅邏輯極之高明：對於真心想玩卡嘅玩家嚟講，包裝遲早要拆，剪咗一角完全唔影響入面嘅卡牌，甚至慳返啖氣力；但對於想將原封不動嘅「新品」高價轉售嘅炒家嚟講，呢個「缺憾」就係致命一擊，完美嘅「盒況」被破壞，轉售價值即時插水，發達夢瞬間幻滅！

網民睇到勁心涼大讚！店舖另設多重關卡嚴打炒賣

事件喺網上曝光後，大批網民即時洗版，激讚店舖做法「勁心涼」、「夠絕夠聰明」，認為呢招精準打擊咗炒家嘅要害。有網民更表示：「睇到啲炒家冇得賺，仲開心過自己抽到靚卡！」事實上，除咗「剪角大法」，呢間舖頭為咗保障真玩家，仲設下咗重重關卡。例如，店舖會將部分商品劃為「15歲或以下顧客限定」，職員會要求客人出示學生證等身份證明文件先賣畀你。同時，店舖亦實施嚴格限購令，好似「Mega Dream EX」卡牌每人每日限買2包，而「Mega」系列則限買5包，擺明車馬就係要杜絕囤積掃貨嘅行為！

粉絲終可原價入手心頭好！炒家或血本無歸蝕到喊

除咗年齡限制同限購，店舖仲要求部分客人要先註冊成為官方LINE帳戶好友先可以購買，方便追蹤任何可疑嘅大量採購活動。雖然有網民話「Mega Dream EX」補充包已經推出咗一段時間，炒風未必好似當初咁勁，但店舖呢種為咗維護興趣圈長期健康發展而採取嘅積極態度，絕對值得一讚。喺呢啲措施之下，真正嘅粉絲終於可以更有機會用原價買到心頭好，而嗰班諗住靠轉售圖利嘅炒家，隨時可能因為手上嘅「殘次品」賣唔出而血本無歸，真係諗起都心涼！